Team Bastida, 3-1 na sa As-Es BAR cagefest

CEBU, Philippines -  Temporaryo karong nagsolo sa liderato ang Team Bastida human sa ilang kadaugan batok sa Team Abella, 89-79 sa first conference sa As-Es BAR basketball tournament niadtong Marso 27 didto sa Benjamin Solon Memorial Gym sa Brgy. Cogon Ramos, ning siyudad.

 Gipakita na usab ni Louie Tanggol ang iyang katakus diin miiskor siya'g 27 puntos aron pangulohan ang Team Bastida, kinsa nakabangon human malubong og 13 puntos sa first quarter, 14-27.

 Ang Team Bastida nga nagbitbit karon og 3-1 nga  baraha, nakapahimulos sab sa serbisyo nilang Reynalds Zamora ug Rocky 'Robacs' Bacalso nga nagkumboya'g 33 puntos.

 Ang solidong depensa nilang Lito Aniñon ug kanhi CCC Executives Leo Villaver nakatabang sab sa Team Bastida pagbulabog sa maayong duwa sa Team Abella, kinsa nakamugna og daghang turnovers sa wala pa madiskaril.

 Napugngan sab nilang Aniñon ug Villaver ang mga key players sa Team  Abella sama nila ni Ariel Llanos, Tonio Sasing ug John Miñoza. Sila si Sasing, Miñoza ug Erick Sabal parehong mitarok og 14 puntos, samtang si Llanos nga mikadlit og 21 puntos atol sa ilang kadaugan batok sa Team Richards igo lang miugbok og 12 puntos.

 Misikit unta ang  Team Abella sa tunga-tungang bahin sa fourth quarter, apan si Arvin Rodriguez mihimo'g duha ka fastbreaks nga nakainat og  balik sa Team Bastida.

 Ang Team Abella nakatilaw sa ilang ikaduhang pilde batok sa usa ka daog ning maong torneyo nga gidumala sa As-Es Sportswear nga gipanag-iya ni Adlaon Brgy. Capt. Elvis Narra sa abag sa Basketball Association of Ramos (BAR).

PUNTOS MATAG USA

 TEAM BASTIDA (89) - Tanggol 27, Zamora 18, Bacalso 15, Rodriguez 8, Lanutan 6, Obcial 5, Aniñon 3, Villaver 2, Bastida 2, Godiz 2, Rojas 1.

 TEAM ABELLA (79) - Sasing 14, Miñoza 14, Sabal 14, Llanos 12,  A. Abella 7, J. Abella 5, Palandang 4, Delina 4, Tancio 3,  Rupero 2. (BANAT PALARO)