Danao mo-host sa ASEAN MTB Cup
CEBU, Philippines - Ipahigayon dinhi sa Sugbu ang 1st ASEAN Mountain Bike Cup, ang labing dakung mountainbike competition sa Southeast Asia unya sa Hunyo 13-15 didto sa Danao City.
Ang kickoff tournament sa ASEAN Mountainbike Cup nauyonan nga adto ipahigayon sa Danao sa dili pa mo-host ang Malaysia alang sa ikaduhang series sa Agosto 15-17 ning tuiga.
Ang lumba sa Sugbu ug Malaysia, duha lang sa four-leg cycling circuit.
Gawas sa Pilipinas ug Malaysia, ang mga nasud nga nagtinguhang mo-host sa maong lumba sunod tuig naglakip sa Singapore, Brunei, Indonesia, Thailand, Cambodia, Laos, Vietnam, East Timor ug Myanmar.
Ang maong lumba nga gipasiugdahan sa Union Cycliste Internationale (UCI) limitado lang sa mga seklista gikan sa Asia lakip na ang mga sakop sa national team.
"This will help our cyclists to develop their talents and help them gain more experience for bigger events like the Olympics," matud pa sa usa sa mga organizers ug sports patron nga si Oscar 'Boying' Rodriguez atol sa paglusad sa maong kalihukan kagahapon didto sa Irie Gastropubliko sa Cebu I.T. Park.
Ang international race gibahin sa cross-country ug downhill events. Mga kategoriya nga tigian sa cross-country naglakip sa men’s elite, juniors, masters, women’s elite ug women’s junior, men’s open (19-above), master A (30-39) ug master B (40-above). Samtang sa downhill mao ang men's ug women’s elite, men's ug women’s juniors (17-18), men’s open, men’s master A ug B.
Ang point system maoy gamiton sa matag leg nga maoy modeterminar sa overall champion sa usa ka serye. (BANAT PALARO)
- Latest
