Roncal bida na sab sa Team Alcover

CEBU, Philippines -  Nahimo na sab nga bida si Randyll Roncal sa kadaugan sa Team Alcover sa ilang duwa batok sa Team Endab, 91-84 sa As-Es BAR First Conference basketball tournament niadtong Marso 24 didto sa Benjamin  Solon Memorial Gym sa Cogon Ramos, siyudad sa Sugbu.

 Ang ex-commercial cager nga si Roncal mipabuhagay og 26 puntos alang sa ikaduhang daog sa Alcover. Namuntos sab pag-ayo ang kanhi CAAA MVP nga si Gerald Ylaya ug si Jet Capoy nga parehong mirehistro og double digits. Si Ylaya milarot og 24 puntos, samtang si Capoy mipupo'g 12 puntos.

 Unang miarangkada ang Team Endab hinungdan nga nakabentaha sila og singko puntos pagtapos sa unang kuwarter, 25-20.

 Ang Team Alcover sa giya ni  Roncal mi-rally sa second period aron mailog ang labaw sa halftime, 41-36.

 Maayong pagkabahin ang iskor sa Team Alcover kay gawas nilang Roncal, Ylaya ug Capoy, pito usab nila ka kaubanan ang nakatampo sab og puntos.

 Unom sa pito ka magduduwa sa Team Endab ang miiskor og double figures sa pagpangulo ni Rey Sidro pinaagi sa iyang 20 puntos. Bugtong  si  Raul Endab lang ang wala makaabot og double figures nga igo lang miiskor og kuwatro puntos.

 Lain pang nakaiskor sa Team Endab mao si John Torres nga mikulit og 17 puntos, gisundan ni Arjohn Colinares sa iyang 12 puntos, Bart Sanchez nga adunay 11 puntos ug Martin  Coyoca ug Henry Realista nga parehong adunay tag-10 puntos.

 Sa laing aksiyon, ang Team Abella walay kukaluoy nga midemolis sa Team Richards, 104-84.

 Sa first quarter pa lang, nakapanimaho  na  og kadaugan ang Team  Abella human sila molabaw og 20 puntos, 36-16 paghuman    sa  maong kuwarter.

 Gipangulohan ang Team Abella ni Ariel Llanos, kinsa mikadlit og 21 puntos. Gisuportahan sab siya ni Aaron Miñoza, kinsa mitikdol og 15 puntos ug Mark Deliña nga mitimang og 13 puntos.

 Sila si Tonio Sasing ug Allan Abella nagkumboya og 22 puntos alang sa Team Abella, kinsa mipahamtang og laing kapildihan sa Team Richards.

 Sila lang si Andrew Biton ug Tambok Bernal ang miiskor og double figures alang sa Team Richards sa ilang 34 ug 11 puntos matag usa. (BANAT NEWS)

PUNTOS MATAG USA

Unang duwa:

 TEAM ALCOVER (91) – Roncal 26, Ylaya 24, Capoy 12, Villarba 8, Alcover 6, Do 6, Piñas 4, Aliñabon 4, Raboy 2, Collonia 2.

 TEAM ENDAB (84) – Sidro 20, Torres 17, Colinares 12, Sanchez 11, Coyoca 10, Realista 10, Endab 4.

Ikaduhang duwa:

 TEAM ABELLA (104) – Llanos 21, Miñoza 15, Deliña 13, Sasing 12, A. Abella 10, Payhang 9, Ropero 8, Abreo 5, J. Abella 4, Tancio 4, Sabal 3

 TEAM RICHARDS (84) - Biton 34, Bernal 11, Fuentes 8, Cabantug 7, Ho 7, Regidor 5, Dela Calzada 5, Rosaroso 5, Tan 2.