Pompe 'hero' sa Team Lim

 CEBU, Philippines - Wala mabantog si Pompe Tañajura  nga  scorer,  apan siya ang nahimong bayani sa Team  Lim   human  niya    giluwas ang koponan gikan sa mga kamot sa Team  Abella pinaagi sa iyang krusyal nga jump shot sa nahabiling 18 segundos sa duwa aron moiskor og laing daog, 88-86 sa As-Es B.A.R. First Conference basketball tournament didto sa Benjamin Solon Memorial  Gym sa Cogon Ramos, ning siyudad.

 Igo lang miiskor og tres puntos si Tañajura sa kinatibuk-ang duwa, apan ang iyang mabayanihong duwa nakatabang sa Team Lim paglikay gikan sa delikadong sitwasyon.

  Ang 'Batman and Robin" sa Team Lim nga silang Glenn Birao ug Erwin Ferrer nagkumboya'g 44 puntos alang sa ikatulong sunod-sunod nga daog ning maong torneyo nga gipaluyohan sa  As-Es Sportswear nga gipanag-iya ni Adlaon  Brgy.  Capt.  Elvis Narra.  

 Ang 6-foot-4 nga si Birao mikimada  og  17 puntos, apan si Ferrer nga adunay gitas-on nga 5-foot-8 maoy daku'g natampo   sa  kadaugan  sa Team Lim pinaagi sa iyang 27 puntos.

 Pwerteng sikita sa maong   duwa gikan sa  pagsugod  hinungdan  nga nagtabla   ang   duha   paghuman sa unang kuwarter, 15-all.

 Makuha     na   unta  sa Team Abella  ang  kadaugan  human magtabla ang iskor sa katapusang higayon, 86-all  sa daginutong  oras  sa  duwa, apan  mikagar   ang   jump  shot ni   Ariel   Llanos  ug  misipyat sab  si  Tonio  Sasing  sa    iyang lay-up sa nahabiling 56 segundos  sa  final  period.

 Ang  heroic  shot  ni Tañajura maoy miselyo sa kadaugan sa Team Lim nga nakakuha sab og 13 puntos  gikan  ni  Nilo Dandan.

 Si Llanos maoy topscorer sa Team Abella nga miratsada'g 21 puntos, gisundan ni Rey Miñoza  sa   iyang  17  puntos ug Sasing nga adunay 15 puntos.

PUNTOS MATAG USA

 TEAM LIM (88) – E. Ferrer 27, Birao 17, Dan-Dan 13, Alesna 8, Abelgas 8, Esplanada 6, T.  Ferrer 4, Tañajura 3, Jurado 2.

 TEAM ABELLA (86) – Llanos 21, Miñoza 17, Sasing 15, A. Abella 9, Abella 8, Sabal 7, Rupero 4, Abrego 4, Cabalida 2. (BANAT PALARO)