Team Bastida mikulit ikaduha nilang daog sa As-Es B.A.R. cagefest

CEBU, Philippines - Ang team Bastida walay kukaluoy nga milubong buhi  sa team Richards, 104-82 aron mokulit sa ilang ikaduhang daog sa nagpadayong aksiyon sa As-Es B.A.R. First Conference basketball tournament didto sa Benjamin Solon Memorial Gym sa Cogon Ramos, Cebu City.

 Sa gilauman, si Louie Tanggol mao na usab ang topscorer sa team Bastida, kinsa maoy midiktar sa tibuok duwa.
 Si Tanggol miiskor og 33 puntos, samtang ang kanhi Cebu Doctors' University (CDU) White Stallions nga si Rocky Bacalso mipamatuod sab sa iyang katakus aron tabangan ang opensa sa team Bastida pinaagi sa iyang 18 puntos. Si  Reynolds Zamora mipaksit og 16 puntos, gisundan ni Lito  Aniñon nga miposa og upat ka three-points alang sa iyang 12 puntos.
 Gitapos sa team Bastida ang unang 10 minutos sa duwa, 23-19, apan mitubo kini ngadto sa 78-59 sa third period sa wala pa maangkon ang 22 puntos nga kadaugan.
 Si Lahug Brgy. councilor Andrew Biton mipabuto'g 22 puntos aron pangulohan ang team Richards, gisundan ni Vergel 'Quick' Fuentes sa iyang 18 puntos ug Arthur Arellano nga adunay 13 puntos.

Puntos matag usa

 TEAM BAUTISTA (104) – Tanggol 33, Bacalso 18, Zamora 16, Aniñon 12, Rodriguez  7,  Pada   6,  Godiz 2,  Sabay  2,  Bastida  2,  Obcial 2,  Rojas  2.
 TEAM  RICHARDS  (82) – Biton   22,   Fuentes  18,   Arellano  13, Rosaroso  6,   Cabantug   6,  Regidor  5,  Bernal  5,  Dela Calzada  5, Sarda 2. (BANAT NEWS)