Ex-NBA bag-ong import sa Barangay Ginebra
CEBU, Philippines - Ang NBA veteran nga si Darnell Jackson maoy kuhaon sa Barangay Ginebra San Miguel aron ihulip sa gipalagpot nga import nga si Leon Rodgers.
Si Jackson tulo na ka tuig nga miduwa sa NBA uban sa Cleveland Cavaliers, Milwaukee Bucks ug Sacramento Kings.
Niadtong Lunes gikataho nga ang kanhi PBA import nga si Gabe Freeman ang kuhaon sa Ginebra hulip ni Rodgers, apan napakyas sila dihang wala kini nila makontak.
Si Jackson ania na sa nasud human siya gikuha sa Meralco Bolts, apan nausab ang desisyon sa Bolts tungod sa maayong labok nga gipakita ni Brian Butch nga mihatag og duha ka sagunson nga daog sa koponan.
Si Rodgers mipakita og abilidad sa opensa alang sa Ginebra diin nag-average kini og kapin sa 30 puntos sud sa tulo ka duwa, apan dili kini igo dihang nakahiagum ang koponan og 1-2 record.
Gawas sa opensa, gipangita sa Ginebra ang usa ka import nga mohaom sa ilang sistema uban sa mga local players.
Sa laing bahin, ang San Miguel Beermen makigharong karon sa Rain or Shine Elasto Painters sa bugtong duwa karong adlawa nga sugdan sa alas-8 sa gabii. (BANAT NEWS)
- Latest
