Sabillo nagpanikad na sa iyang title defense
CEBU, Philippines - Nagpanikad na si WBO minimumweight champion Merlito 'Tiger' Sabillo (23-0, 12KOs) nga manalipod sa iyang bakus batok ni Mexican Francisco 'Chihuas' Rodriguez (13-2, 9KOs) karong Domingo didto sa Arena Monterrey sa Nuevo Leon, Mexico.
Si Sabillo uban sa laing ALA world champion nga si WBO light flyweight king Donnie Nietes, kasamtangan nga atua sa Estados Unidos diin didto sila mipahigayon sa ilang training.
Ang 30-anyos nga si Sabillo mag-atubang na sab og lisud nga hagit sa pagdepensa sa iyang bakus sa labing unang higayon gawas sa nasud.
"Andam na gyud si Merlito ug ang iyang training dinhi sa US daku og natabang sa pag-improve sa iyang kusug ug speed," matud pa ni ALA Chief trainer Edito Villamor.
Sila si Sabillo ug Nietes nag-train og kapin usa ka buwan didto sa House of Boxing Gym sa San Diego, California ug sa sikat nga Wild Card Boxing Gym ni Freddie Roach.
"Sugod siya og training niadtong January sa ALA Gym maong makaingon mi nga preparado na gyud si Merlito. Ang iyang nakat-onan dinhi sa US mao ang proper training ug experience."
Si Sabillo nakasungasong og lisud nga title defense niadtong Nobiyembre didto sa Araneta Coliseum batok sa No. 1 contender nga si Carlos Buitrago sa Nicaragua diin miresulta kini sa usa ka sikit nga split draw decision.
"Daghan ko nakat-onan sa last nako nga away ug gusto ko nga ipakita akong improvement sa among away ni Rodriguez," matud pa ni Sabillo.
Hinuon, dili kakompiyansaan si Rodriguez kay midaog siya og pito sa katapusan niyang walo ka away.
Ang iyang pilde nagagikan ni Nicaraguan champion nga si Roman Gonzales niadtong Septiyembre sa miaging tuig. (BANAT NEWS)
- Latest
