Xterra Triathlon mosikad karon

CEBU, Philippines - Kapin sa 400 ka mga atleta ang isog nga mosungasong karon sa hagit sa 2014 Vaseline Men Xterra Off-Road Triathlon Championship didto sa Lilo-an, Cebu.

 Ang Australian nga si Ben Allen modepensa sa iyang titulo alang sa talagsaong "grandslam" victory, apan mag-atubang siya og lisud nga hagit batok sa ubang foreign elite triathletes.

 Tinguhang mobabag sa   gilaraw nga "grandslam" ni  Allen  mao sila si  Shahrom Abdullah sa Malaysia, Michael Bucek sa Slovakia, Charlie Epperson sa Guam ug  sila si Daniel Hugo ug Bradley Weiss sa South Africa.

 Sa laing bahin, si Lesley Paterson gikataho nga dili makapanalipod sa iyang korona sa women’s premier division tungod sa personal nga rason.

 Tungod niini, bakante ang titulo nga ilogan sa ubang elite women triathletes sama nila ni veteran Swiss Miss Renata Bucher sa Switzerland, teammate niini nga si Carey Mieko, Dimity Lee Duke ug Darrelle Parker sa Guam ug mga pambato sa United Kingdom nga sila si Jacqui Slack ug Carina Wasle.

 Sa Filipino elite division, ang Cebu-based triathletes nga si Joseph Miller laraw nga mokulit og "back-to-back" championship. Si Lovelinelle Casidsid maoy   inilog nga modaog sa Pinay division.

 Gawas sa premier ug Filipino elite category, lain pang age-group race  naglakip sa men’s 40-44, 30-44 ug 35-39 year-old class.

 Adunay 13 ka koponan ang mosalmot sa relay competition.

 Gawas sa dakung ganting salapi, ang  top placers makakuha usab og luna alang sa Xterra World Championship didto sa Maui, Hawaii sa hinapos nga bahin ning tuiga.