Cebuano MMA fighter daog sa Dubai

CEBU, Philippines -  Milampos ang Dubai-based Cebuano Mixed Martial Arts (MMA) fighter nga si Vaughn ‘Spawn’ Donayre sa labing una niyang sangka gawas sa nasud dihang miiskor siya og usa ka unanimous decision nga kadaugan batok ni Mohamed Isaef sa Hard Knox Fight Night niadtong miaging gabii didto sa Du Forum sa Yas Island, Abu Dhabi.

Ang garbo sa Yaw-Yan ArDigma-Cebu mipakita sa iyang abilidad sa ground control uban sa hait nga striking aron lupigon sa puntos ang hometown fighter nga si Isaef kinsa nagkadugo human makatilaw og mga bangis nga tira gikan ni Donayre atol sa ilang tulo ka rounds nga gera.

Ang 30-anyos nga si Donayre usa na unta ka top contender alang sa Universal Reality Combat Championship (URCC) title, apan nakahukom siya nga mobiyahe sa gawas sa nasud aron mamasin og mas dagkung fight offer.

Sa maong kadaugan si Donayre mipalambo sa iyang perpektong record ngadto sa 7-0. Katapusan siyang midaog niadtong Abril 27 sa miaging tuig batok ni MMA veteran Rex De Lara pinaagi sa split decision didto sa SMX Convention Center sa Manila. (LPM) (BANAT NEWS)