Mayor's office nakadepensa sa titulo

CEBU, Philippines -  Milampos ang Mayor's Office pagdepensa sa ilang titulo human literal nilang gidemolis ang Cebu City Medical Center (CCMC) team pinaagi sa pag-iskor og 118-88 nga kadaugan atol sa finals sa Cebu City Hall Inter-Department basketball tournament kaniadtong Biyernes didto sa San Nicolas gym, ning dakbayan.

Nag-igo na sab gikan sa three-point territory si Mayor Mike Rama kinsa mipataruy og 17 ka triples aron pangulohan ang opensa sa Mayor's Office sa iyang 51 puntos. Nagpang-lingo si Mayor Rama human sa duwa ug medyo gianugonan sa iyang mga sipyat. Gamay ra hinoon kaayo ang iyang nahimo kung itandi sa iyang 28 ka three-pointers dihang ilang gipukan ang CCMC, 126-87 sa ilang finals preview ug non-bearing match diin tres puntos na lang ang kuwang iya untang matablahan ang iskor sa ilang kaatbang pinaagi sa iyang 84 puntos.

Niadtong Marso 1 batok sa Sangguniang Panglungsod (SP), mihimo'g 23 ka triples si Mayor Rama sa ilang 131-77 nga kadaugan aron maangkon ang unang luna sa finals.

Ang finals batok sa Mayor's Office ug sa CCMC tataw nga gipangandaman gyud og maayo sa mga pro-Rama fans kinsa nagsul-ob og pula nga t-shirts nga mao sa'y bulok sa uniporme sa Mayor's Office ug makabungog nga hugyaw ang ilang himoon matag higayon nga matuhog ni Mayor Rama ang net gikan sa maayong screen sa iyang mga teammates.

Gawas pa gyud naina, nagdala sab ang mga fans og drum corps nga nakadugang og kagahob sa benyu. Dunay gitaud nga wide screen sa walang bungbong sa gym.

Duna sa'y mga unipormadong polis sulod ug gawas sa benyu gawas pa sab sa nag-standby nga rescue unit sa higayon nga adunay mapiang.

Matud pa ni coach Charlie Reyes, mga CD ipanghatag ngadto sa mga sakop sa champion team isip handumanan sa finals.

Misaksi sa maong duwa ang inspirasyon ni Mayor Rama kinsa maoy nangu sa sabaan kaayong cheering squad nga si kanhi Cebu City councilor Atty. Joy Pesquera.

Ang ex-Lancer nga si Rene Toring midugang og 19 puntos lakip ang duha ka triples sa fourth period samtang  ang kanhi CIT Wildcat nga si Emilio Aniñon midugang og 17 puntos aron maoy ikatulong player sa champion team nga mibahug og double figures.

Si Larry Wong kinsa usa ka registered nurse, maoy nangu sa opensa sa CCMC sa iyang 20 puntos apan bisan ang 19 puntos nga gidugang sa tirador ug ex-pro nga si Danny Aying wala makahulga sa Mayor's Office kinsa maoy naglabaw gikan gyud sa sinugdanan.

Mao kadto'y unang higayon nga miabante sa finals ang CCMC sulod na sa pipila ka tuig sa ilang pagsalmot sa Inter-Department.  

Sa sayo pa, nasakmit sa Department of Public Service (DPS) ang ikatulong pwesto human sila modaug batok sa SP, 120-106. 

Puntos matag usa:

Mayor's Office (118)— Rama 51, Toring 19, Aniñon 17, Magan 9, Abellana 6, Vidal 4, Torres 4, Babatid 4, Tabar 2, Baculio 2

CCMC (88)— Wong 20, Aying 19, Labi 18,  Archival 8, Barcenas 8, Abellanosa 6, Pesole 2. Halftime: 56-39. (BANAT NEWS)