QCU miiskor og daog sa Aboitiz cup

CEBU, Philippines - Nakahimo gihapon sa pag-iskor og daog ang defending champion Queen City United (QCU) booters  bisan wala ang ilang head coach nga si Mario Ceniza  tungod sa mga kakulian.

Gisirohan sa QCU ang Team Leylam, 2-0 sa Group C sa premiere  men's open division sa 16th Aboitiz Cup football tournament niadtong Domingo didto sa Aboitiz Sports Field sa Brgy. Subangdaku, dakbayan sa Mandaue.

Human magtabla sa first half, si Allan Medalle, kinsa maoy mitimon sa koponan hulip ni Ceniza, mihimo og mga kausaban ug ang QCU booters mihimo'g duha ka goals, samtang ang Leylam wala gyud makaiskor tungod sa ilang grabeng depensa.

 Si Junard Aguilar maoy unang naka-goal alang sa QCU sa 55th ug dayon si Rommel Quizon human sa 14 minutos.

 Sa laing aksiyon sa men's open, ang University of Cebu (UC)  milatigo  sa  Crazy Horse, 5-0 ubos sa Group B.

 Ang QCU 38-above team kursonada kaayong mosulod sa sunod hugna dihang ilang gidemolis ang Hipodromo FC, 5-0.

 Sila  si  Michael  Rick  Baring, Edgar Quitor, ug Neon Ouano maoy  naka-goal alang sa QCU team.

 Sa laing duwa sa 38-above, ang JEH United midaog batok sa Hiroshi, 1-0.

 Sa bugtong duwa sa under-23 division, ang Don Bosco Technology Center (DBTC) mipulbos sa Subangdaku FC, 3-0. (BANAT PALARO)