Team Raco/Hofer midaog na sab og korona
CEBU, Philippines - Nidaog na sab og laing korona ang Team Raco/Hofer ni coach Van Halen Parmis human maka-eskapo sa Montaña Pawnshop sa Davao City, 85-83 sa ilang taktakay nga kampiyonato sa 13th Araw ng Sibugay Governor's Open Basketball Tournament nga gidugokan og kapin sa 9,000 ka mga tawo didto sa Ipil Sports Complex sa Ipil, Zamboanga Sibugay.
Kini ang ikatulong sunod-sunod nga titulo nga nadaog sa Team Raco/Hofer.
"It's an honor for us to play before such a huge crowd and winning the championship was really a sweet icing on our victory cake," matud pa ni Parmis, kinsa mao sab ang assistant coach sa reigning CESAFI champions University of the Visayas (UV) Green Lancers.
Sa wala pa manulong didto sa Ipil, ang Team Raco/Hofer nga gipaluyohan ni Zamboanga Sibugay Vice Governor Rey Andre C. Olegario ug Congresswoman Ann Kintanar Hofer misakmit og korona sa Kabalasan Mayor's Cup Invitational.
Si Ferdinan Lusdoc ang nangulo sa Team Raco/Hofer nga mikudlit og 25 puntos, gisundan ni Alfred Gerilla sa iyang 17 puntos ug Ardy Larong nga adunay 15 puntos.
Ang Montaña Pawnshop gipangulohan sab ni Marlon Basco, kinsa mikuykoy og 16 puntos, samtang si Ronald Lamocha miugkat og 14 puntos sa maong kapildihan.
Ang Team Raco/Hofer mibulsa og P150,000 check bugti sa ilang paghari sa torneyo.
Gisuportahan sa duha ka langyaw'ng magduduwa nga sila si Joe Etame ug Basier Sacor, lain pang players sa koponan naglakip nilang Al Vergara, Reed Friar Juntilla, Loemar Losentes, Dino Daa, Dennis Daa ug Jovanie Aguilar. (BANAT NEWS)
- Latest
