SHS-AdC booters nagmangtas
CEBU, Philippines - Nagpadayon ang kamangtas sa Sacred Heart School-Ateneo de Cebu (SHS-AdC) booters sa aksiyon sa 16th Aboitiz Cup football tournament didto sa Aboitiz Sports Field sa Brgy. Subangdaku, dakbayan sa Mandaue.
Ang SHS-AdC milansang og 4-1 nga kadaugan batok sa Don Bosco Technology Center (DBTC) sa under-11 semifinals aron moabante sa finals.
Sangkaon sa SHS-AdC ang University of San Carlos-Basic Education nga misulod sab sa kampiyonato human nila sirohi ang Lahug FC, 2-0.
Sa under-13 quarterfinals, ang SHS-AdC miagi pa og kalisud una nila masakmit ang sikit kaayong kadaugan, 6-5 batok sa Subangdaku FC sa penalty shootout.
Lain pang aksiyon sa quarterfinals sa under-13, ang Abellana National School-Pomeroy ug Springdale mitikdol sab og daog.
Ang ANS-Pomeroy nidaog pinaagi sa "default" batok sa Mactan Camellanz, samtang ang Springdale mipilde sa DBTC-1, 6-4 pinaagi sa shootout.
Bisan pa niini, angay sab nga magsadya ang Bosconians human ang DBTC-D nakakuha'g pasaporte sa finals sa under-9. Ang DBTC-D naka-eskapo sa ilang igsuong koponan DBTC-A, 4-3. Sangkaon sa DBTC-D sa finals mao ang Lahug FC nga mipalagpot sa DBTC-B, 1-0. (BANAT NEWS)
- Latest
