UC-ERCO kampiyon sa 11th Thirsty Cup

CEBU, Philippines -  Milahutay ang University of Cebu (UC)-ERCO sa makutas nga duwa batok sa lig-on sab nga koponan, ang Leylam FC ug miiskor kini'g nipis nga kadaugan, 4-3 aron masakmit ang korona sa men's open sa 11th Thirsty Cup Football  Festival didto sa Cebu City  Sports Center (CCSC).

 Walay nahagdaw nga iskor ang duha ka kampo sa regulation period, apan ang UC-ERCO nga gibitoonan sa South Korean booters mipruyba nga usa ka dekalibreng koponan sa penalty shootout paingon ngadto sa kadaugan.

 Ang Cebu-ERCO-Korea ni coach Glenn Ramos mipalagpot sa defending champion Don Bosco United pinaagi gihapon sa pagdaog og uno punto, 2-1  sa quarterfinal round. Gipilde sab nila ang Warshocks, 1-0 sa semis aron makigdwelo sa Leylam FC sa finals.

 Angay gihapon nga magsaulog ang Leylam FC dihang ilang gipilde ang Abellana National School (ANS), 1-0 aron modaog sa boys 18 title.

 Mikawat sab og salida ang Sacred Heart School-Ateneo de Cebu human nila gipilde ang Global Elite Youth B, 2-1 pinaagi sa penalty shootout aron maghari sa boys 13 age group.

 Sa laing bahin, ang Don Bosco Technology Center (DBTC) midaog og duha ka titulo pinaagi sa boys 15 ug 11 divisions. Ang DBTC-A nagmadaugon batok sa Badian Lions, 5-4 sa boys 15 finals, samtang ang DBTC-E miiskor og 2-1 nga kadaugan batok sa Giuseppe FC sa boys 11 category.

 Sa pikas bahin, ang Talisay Minuluan sa Negros Oriental midaog sab og duha ka korona pinaagi sa girls 18 ug ladies open.

 Lain pang nidaog og korona sa tulo ka adlaw nga torneyo nga gisuportahan sa Cebu  Football Association (CFA) mao ang Bright Academy sa mixed under-7, Lahug Elementary  School sa mixed under-9, Tubigon FC sa boys 20, KN Ferraren sa men's 38, San Carlos City sa girls 15 ug University of San Carlos (USC)-White sa girls 20.