Basketball sa Tagoloan alegre ug gisuportahan

CEBU, Philippines - Usa sa misalmot sa tulo ka adlaw nga torneyo nga gitawag og  2014 Cebu City Charter Day Cup basketball tournament mao ang  Tagoloan Tigers, usa ka amateur team kinsang mga players  kadaghanan Bisaya ug pipila kanila mga Sugboanon.

Ang Tagoloan usa ka progresibong lungsod sa Misamis Oriental ug unahan lang gamay sa dakbayan sa Cagayan de Oro diin usa  sa labing paboritong mao ang basketball. Sila maoy bugtong amateur  team nga nangahas sa  pakigsangka batok sa tulo ka PBA teams sa Charter Day Cup  nga mao ang Alaska Aces, GlobalPort Batang Pier ug Talk 'N  Text Tropang Texters. Bisan og usa lang sila ka amateur team  apan gipaningot og bugbog ang GlobalPort Batang Pier  niadtong Sabado diin diriyot nila pakauwawi tungod kay ang Batang Pier igo lang midaog og otso puntos, 81-73 ug makita  sa panagway sa mga players ug team officials nga kuntento na sila sa maong kapildehan kay ilang na-apas ang 20 puntos nga biya.  Sa miaging adlaw, akong nahinabi si Mayor Paulino Yap Emano,  ang wala'y pilde-pildeng politiko sa Tagoloan nga anaa na sa  iyang ikatulong termino ug nagserbisyo isip mayor sa maong  lugar sulod na sa 21 ka tuig. Ang Tagoloan, usa karon sa labing adunahan nga lungsod sa Misamis Oriental.

Duna kini populasyon nga 70 mil ug 34 mil  niini ang voting population. Matod pa ni Mayor Emano, nag-anam na karon ka daghan ang mga pabrika sa Tagoloan busa  nahimo na kini karong usa ka industrial town gikan sa farming ug fishing town.

Makita sa Tagoloan ang usa ka international container yard nga nakatampo og dako sa ilang  panudlanan ug didto sab  makita ang Tagoloan river nga maoy labing dako sa Mindanao  ug ang Tagoloan bridge nga maoy labing taas nga tulay o taytayan. Matod pa ni Mayor Emano nga dunay daghang sports talents ang Tagoloan nga naglakip sa basketball, softball, karate ug volleyball. Usa sa labing inilang basketball player sa Tagoloan mao si Ulysses :Buboy" Tanigue kinsa kanhi player sa Purefoods Hotdogs sa PBA. Produkto siya sa San Sebastian College apan nakaduwa siya kanhi sa CAAA sa wala pa siya mobalhin sa Manila. Naporma ang Tagoloan Tigers nga kanhi usa lang ka team gikan sa barangay level nga gipasiugdahan sa ilang barangay kapitan nga si Gomer Sabio kinsa maoy nagsilbing team  manager.

Daghan kaayo'g mahiligon sa basketball sa Tagoloan ug taas kaayo ang "expectation"  sa katawhan sa ilang team busa kinahanglan sab nilang patas-an ang level sa kumpetisyon.

Tungod niini kanunay silang mopasiugda og Mayor's Cup didto  sa Tagoloan matag tuig  nga pagasalmotan sa mga teams gikan sa Davao, Iligan , Butuan ug Surigao ug bisan og medyo dili kaayo dako ang ilang gym, mosulod  lang gihapon  kini'g dul-an sa tres mil ka tawo. Duna sa'y posibilidad nga mosalmot angTagoloan Tigers sa Countrywide Developmental basketball league  nga pormahon ni kanhi national team coach Joe Lipa sa dili  madugay.  Nagkahimamat na silang Mayor Emano ug Atty. Baldomero C.  Estenzo kalabot niini apan sa kasamtangan, wala pa mohatag sa ilang kumpirmasyon ang Tagoloan Tigers ni coach Van Parmis apan mipasalig si Mayor Emano nga mokontak lang sila  ni Lipa kung hingpit na silang makahukom ug gitabangan ni  Atty. Estenzo si Lipa niining maong proyekto dinhi sa Sugbo ang Countrywide Developmental League nga sugdan unya sa Hunyo, adunay format nga susama sa Philippine Collegiate  Champions League (PCCL) nilang coach Lipa ug Rey Gamboa,  isalida sa telebisyon.

Dunay labing menos 16 ka teams ang target sa maong  torneyo---upat sa Metro Manila-NCR, upat sa Luzon Area, upat sa Visayas ug upat sab sa Visayas. Adunay elimination phase  sa upat ka nahisgotang lugar ug ang top two teams moabante sa quarterfinals.

MISCELLANEOUS. Congrats to June Mar "Abai" Fajardo for  having been awarded the Best Player of the Conference that boosted his MVP chances.