Talk 'N Text, Global Port magbagat karon sa Cebu Coliseum
CEBU, Philippines - Magbagat karon ang Talk ‘N Text Tropang Texters ug ang Global Port Batang Pier sa ikatulo ug katapusang adlaw sa 2014 Charter Day Cup basketball tournament diha sa Cebu Coliseum.
Ning pagsuwat, nagduwa pa ang amateur team nga Tagoloan Tigers gikan sa Misamis Oriental ug ang Global Port didto sa Mandaue City Cultural and Sports Complex.
Ang duha pulos nangapilde sa ilang opening game batok sa tagsa-tagsa nilang kaatbang niadtong Biyernes sa gabii didto sa Cebu Coliseum.
Nagkumbati sab sa Mandaue ang Tropang Texters ug ang Alaska Aces nga magbinuk-anay sa ilang 1-0 record alang sa solong liderato.
Ang team nga adunay daghang daog sa maong torneyo maoy ilhon nga kampiyon.
Bisa'g tataw nga underdog ang Tagoloan, daku kaayo nilang dungog nga usa ka dili kaayo inilang lungsod sa Misamis Oriental nahataga'g higayon nga makigsangka sa mga PBA teams nga maoy mga idolo sa ilang players. Usa na niini ang ilang assistant coach nga si Ulysses 'Buboy' Tanigue nga taga-Tagoloan. Siya usab karon ang sports director sa Tagoloan Community College, ang bugtong kolehiyo sa maong lungsod.
Si Tanigue, kanhi player sa Purefoods Hotdogs sa PBA, kanhi player sa Bohol Institute of Technology (BIT) Cruisers sa wala pa siya mobalhin ngadto sa San Sebastian College Golden Stags, diin siya maoy numero unong pointguard sa ilang panahon. (BANAT NEWS)
- Latest
