Cebu morepresentar sa Nat'l Finals

CEBU, Philippines - Wala papormaha sa UV Lancers-Cebu PRISAA ang ilang kontra nga Bohol-PRISAA pinaagi sa pagharos sa ilang best-of-three series aron modaog sa korona sa 2014 Private Schools Athletic Association (PRISAA) men’s basketball tournament didto sa USC Main gym.

Midaog ang Cebu pinaagi sa paglubong sa Bohol, 96-54 niadtong Sabado sa buntag, ug pagka hapon ila gihapon gilubong ang Bohol, 104-77.

Si Francisco Arong Jr. maoy nangu sa Cebu sa iyang 20 puntos, gisundan nilang John Abad ug Leonard Santilla nga  adunay 15 puntos matag usa.

Lain pang  naka-iskor og double figures alang sa Cebu mao si  Wowie Escocio  nga mikulit og 12 puntos ug  silang Chris Perolino ug Rhaffy Octobre nga pulos miiskor og 10 puntos.

Tungod sa maong kadaugan, ang Cebu maoy  morepresentar sa PRISAA National Finals unya sa Abril 6-10 didto sa Tagum City, Davao del Norte.