Melly, Chemutai nidominar sa SM2SM Run 4

CEBU, Philippines - Mikawat og salida ang mga langyaw'ng runner sa SM 2 SM Run 4 niadtong Domingo sa buntag didto sa SM City-Cebu carpark.

Ang Kenyan nga si Alex Melly mitala og personal best dihang iyang gidominar ang 21K men's premier open. Gitapos niya ang lumba sud sa usa ka oras, lima ka minutos ug 50 segundos. Iyang nabuak ang karaan niyang rekord nga 1:06.29 duha na ka tuig ang milabay didto sa Malaysia.

Ang iyang kadugong Kenyan nga si Benjamin Kipkazi nalandig sa ikaduha sa oras nga 1:06.05, gisundan ni Eliphiz Kipngetic sa oras nga 1:08.16.

Sa pikas bahin, si Immaculate Chemutai sa Uganda mao sab ang nanghawod sa women's division human siya milabang sa finish line  sa oras nga 1:20.40. Gipilde niya ang marathon queen sa Sugbu nga si Mary Joy Tabal, kinsa mitapos sa ikaduha sa oras nga 1:22.22, samtang si Susan Jemutai sa Kenya mi-okupar sa ikatulo nga mi-oras og 1:27.05.

Giharos sa Kenyan ang unang tulo ka puwesto sa  12K men's division sa pagpangulo ni Willy Tanui  (36:54), Isaac Simat (36:55) ug Abraham Missos (39:11).

Sa women's division, sila si Lovely Andrin (50:45, Keisha Delechos (50:47) ug Christy Sevilleno-Tutor (57:20) maoy miangkon sa unang tulo ka luna.

Sila si Noy ug Amale Jopson maoy nag-una sa couples 21K category uban sa oras nga 1:43.38,  samtang silang Mendel  Lorhiz Lopez  nga mitapos  sa lumba sa oras nga 58:58 maoy nidominar sa 12K class.

Ang igsuon ni Lovely nga  silang Cherry (24:52) ug Jhean (25:49) miangkon sa unang-duha ka dapit sa 6K women's category, samtang si Rafael Piscos (19:16) sa men's division.

Sa laing bahin, si Kit Reguero (21:05) maoy naghari sa Persons With Disabilities (PWD)  3K category human midaog batok nilang  Rene June Quiñones (23:25) ug Joe Quiñones (23:40).