Prisaa regional meet buksan karon

CEBU, Philippines - Turno na sab sa mga  kolehiyong atleta nga mopakita sa ilang katakus dihang ang Private Schools Athletic Association (PRISAA) Regional Meet mosikad karong buntag didto sa University of San Carlos  (USC) gym sa dalan Sanciangko, ning siyudad.

 Tulo lamang ka delegasyon ang magsangka sa PRISAA nga pangulohan sa host Cebu, Bohol ug Negros Oriental.  Ang Cebu girepresentahan sa mga nag-unang atleta gikan sa Cebu Schools Athletic Foundation Inc. (CESAFI).

 Sagad sa mga duwa adto ipahigayon sa Cebu City Sports Center (CCSC) nga naglakip sa athletics, badminton, boxing, dance sports, swimming ug taekwondo.

 Sa laing bahin, ang basketbol ug chess adto duwaon sa USC gym.  Ang football sa Don Bosco Technology Center (DBTC), samtang ang lawn tennis sa Baseline Sports and  Recreation Center. Ang University of Cebu (UC)-main maoy mo-host sa sepak takraw, karatedo ug table tennis, samtang ang  Aznar Coliseum  maoy binyu sa indoor ug beach volleyball.

 Ang top performers sa duha ka adlaw nga kompetisyon maoy morepresentar sa Central Visayas ngadto sa PRISAA National Finals nga gikatakda sa Abril 6-12 didto sa Tangub City.