Accenture milangkat sa Inter-BPO title sa 16th Aboitiz Football Cup
CEBU, Philippines - Gisirohan sa Accenture booters ang Innodata, 2-0 aron sakmiton ang Inter-BPO title sa 16th edition sa Aboitiz Football Cup niadtong weekend didto sa Aboitiz Sports Field sa Brgy. Subangdaku, dakbayan sa Mandaue.
Unang naka-goal ang Accenture kortesiya ni Albert Nangkil sa 25th minutos sa duwa. Gisundan ni Earl Montero, kinsa mipasud sa ikaduhang goal nga maoy mikandado sa kadaugan.
Sa laing bahin, ang Convergys miangkon sa ikatulong puwesto pinaagi sab sa 2-0 nga kadaugan batok sa Lexmark.
Sa girls' 15 division, ang Tabor Hills mipilde sa St. Theresa's College (STC) aron langkaton ang korona, samtang ang Don Bosco Technology Center (DBTC) ug Tabor Hills mao sab ang nanghawod sa under-7 ug under-15 divisions.
Sa Inter-company, ang San Miguel FC nidaog batok sa Leylam FC, samtang ang T-United midaog sab batok sa ERCO, 2-1.
Hinuon, ang ERCO nakabawi pinaagi sa 38-above division dihang ilang gipanitan ang KN Ferraren, 10-1.
Sa under-23, ang Leylam booters mipukan sa Continental FC, 2-1, samtang ang DBTC yano kaayong midaog batok sa St. John Seminary sa under-15 division.
Ang defending champion Queen City United mihipos og 6-0 nga kadaugan batok sa Liloan FC sa men's open division. (BANAT PALARO)
- Latest
