Talisay karatekas midaog bulawan sa Batang Pinoy

 CEBU, Philippines - Ang koponan sa dakbayan sa Talisay midaog og duha ka  golds, usa ka silver ug tulo ka bronzes sa karatedo event sa Batang Pinoy National Finals ning bag-o lang didto sa Bacolod City.

 Gipangulohan ni Gerald Augustine Baclaan ang kadaugan sa karatekas sa Talisay nga mikabkab og duha ka bulawan pinaagi sa team kata competition (synchronize) mixed age category uban nilang Felix Calipusan ug Jeremy Nopre ug sa boys' kata advance 44 kgs. division.

 Si Baclaan, 14-anyos, tinun-an sa Don Bosco Technology Center (DBTC), nidaog sab og bronze sa boys' kumite 44 kgs. class.  Ang laing duha ka bronze gitunol nilang Calipusan, ang 13-anyos nga tinun-an sa Punta Princesa National High School sa boys' kata advance ug kumite nga pulos ubos sa 40 kgs. division.

 Ang bugtong silver nga nakuha sa Talisay nagikan ni Nopre pinaagi sa boys' kata advance 53 kgs. division. Ang 12-anyos nga si Nopre nagtungha sa Virgen dela Escuelas Pias.

 Ang koponan gipangulohan sa ilang head coach ug trainor Rhodee Antoinette Saavedra ug assistant coach Ky-Za Ocampo. (BANAT NEWS)