Pinoy sa Winter Olympics
Duna tay pure-bloodied Filipino ug maoy labing una nga miapil sa Winter Olympics sud na sa 22 ka tuig nga karon gipahigayon sa Sochi didto sa Russia.
Si Michael Christian Martinez maoy nagwara-wara sa atong bandila atol sa opening sa maong prestihiyosong Winter Olympics nga gidominar sukad pa kaniadto sa mga kanasuran nga adunay niyebe o snow ug ice caps.
Walay ingon niini dinhi sa ato, apan wala kini magpasabot nga way Pinoy nga makaduwa sa snow di ba?
Mao na si Martinez nga nagbinugtong nato nga discipline nga giapilan niini nga torneyo. Figure skating ang iyang giapilan tungod lagi sa iyang kahilig niini naningkamot siya ug mi-qualify pa gani nga makaapil ug morepresentar sa atong nasud.
Gani sa report sa NBC, ang 17-anyos nga si Martinez mao pa usab ang labing unang South East Asian nga miapil sa figure skating. Nagpasabot nga kita pa ang taga SEA nga ni-qualify ani nga matang sa sport.
Hinuon, dili si Martinez ang labing unang Pinoy nga nakaapil sa Winter Olympics kay niadtong 1972, 1988 ug 1992 nakapadala kita og upat ka partisipante sa duha ka mga events nga Alpine Skiing ug Luge.
Nakat-on siya og ice skating sa edad nga 8-anyos diha sa usa ka ice skating rink sud sa mall sa Parañaque. Nasayod ba kamo nga hubakon diay ni si Martinez ug permi na lang magsud-gawas sa tambalanan?
Sa iyang pag-apil-apil niini nga duwa, nakahakot na usab siya og daghang mga medalya sa local competitions ug bisan na sa international tournaments sama sa Junior Grand Prix series niadtong 2011 ug milangkat og gold medal sa 2012 Crystal Skate sa Romania, nga usa ka senior-level international figure skating competition.
Dili usab kabentahaan si Martinez kay sa miaging tuig, ikalima siya sa 2013 World Junior Championships. Nabutang usab siya sa ikapito nga pwesto sa 2013 Nebelhorn Trophy sa men’s singles nga maoy qualifying event sa Winter Games.
Nagpasabot kini nga ang mga makaatbang niya sa Sochi Winter Olympics posibleng mga nakaatbang ug gipangpilde na niya didto.
Ang nakapaguol lang na ko nga nagtan-aw kagahapon sa kaadlawon sa TV 5 Channel atol sa opening, siya ra ug ang tulo ka coaching staff ang nagparada pagsud sa entrada.
Ang ubang mga teams sama sa USA nagpadala og kapin duha ka gatos ka atleta, apan duna say parehas sa Pilipinas nga tagsa ray atleta nga gipadala. Ang uban kanila gi-mention ang natigom nang mga medalya sa Winter Olympics sukad sa ilang pag-apil.
Ang nakapalipay na ko gamay mao ang pagsulti sa babayeng tv announcer pagsud sa contingents sa Pilipinas nga "this man is a very talented figure skater," either nakaila siya ni Martinez o gibasi niya kini sa ilang background checking sa matag atletang angayang tutokan.
* * *
PAGTULON-AN: "Resentment is like drinking poison and then hoping it will kill your enemies."
NELSON MANDELA,
kanhi presidente sa South Africa
* * *
- Latest
