CVIRAA sugdan na
CEBU, Philippines - Pormal na nga buksan ang 2014 Central Visayas Regional Athletic Association (CVIRAA) Meet karong hapon diha sa Cebu City Sports Center (CCSC).
Sa dili pa ang pormal nga pagbukas, adunay ipahigayon nga Holy Mass sa alas-9 sa buntag diha sa CCSC multi-purpose gym.
Ang opening ceremony nga tambungan sa 10,000 athletes, coaches ug officials, sugdan sa alas-3 sa hapon diin adunay ipasundayag sa mga Cebuano talents sama sa Sinulog Idol 2014 winners ug Sinulog dance crew winners.
Isunod dayon ang program proper uban ni DepEd VII Director Carmelita Dulangon ug Cebu City Mayor Michael 'Mike' Rama nga gitakdang mohatag sa tagsa-tagsa nilang mensahe ngadto sa mga delegado.
Ang volleyball player sa Abellana National School nga si Ulyross Lopez, kinsa lakip sa koponan nga nidaog og bronze sa 5th ASEAN Schools Games didto sa Hanoi, Vietnam sa miaging tuig maoy modagkot sa urna.
Panapos nga bahin sa programa mao ang top performers sa Sinulog nga pangulohan sa Lumad Basakanon ug tapuson kini pinaagi sa fireworks display.
Ang Lumad Basakanon maoy kampiyon sa Sinulog grand parade free interpretation category.
Lain pang morampa mao ang Banilad Elementary School nga nidaog sa Sinulog sa Kabataan sa Dakbayan, Abellana National School, Apas National High School ug Don Sergio Osmeña Sr. Memorial National High School, ang top three finishers sa Sinulog sa Kabataan ubos sa secondary division. (BANAT NEWS)
- Latest
