VMA-Power chess tourney mosikad na

CEBU, Philippines - Magkuros na sab ang dalan sa mga tang-ang chess players sa 2nd VMA-Power Open Chess Tournament nga mosikad karong adlawa diha sa Colonnade Mall sa dalan Colon, ning siyudad.

 Gibana-banang mokabat ngadto sa P30,000 nga ganting salapi ang giandam alang sa top  performers ning duha ka adlaw nga torneyo.

 Ang 9-round Swiss system competition gipasiugdahan ni Engr. Marvyne 'Suntzu' Guardiana sa VMA-Power Group of Companies  uban sa abag sa Cebu Executives and Professionals Chess Association (CEPCA) ubos sa liderato  ni Engr. Jerry Maratas.

 Si Guardiana mao sab ang kasamtangan CEPCA Vice President for External Affairs.

 Mouli bitbit ang P6,000 nga ganting salapi ang makampiyon sa maong torneyo. Ang second   placer makadawat og P4,000, ang third makaangkon og P3,000. Ang mokapyot sa ikaupat ug ikalima nga dapit makadawat og P2,000 ug P1,000 matag usa.

 Hatagan sab og P500 matag usa ang mopahiluna gikan sa ikaunom hangtod sa ika-10 nga dapit. Ang ika-11 hangtod sa ika-20 makadawat og pahalipay nga P400 matag usa, samtang kadtong mga entrante nga nasulod sa top 30  makadawat og consolation prize nga P300 matag usa.

 Ang top finishers sa Cepcans, junior, kiddie ug lady players makadawat og insentibo nga P500.

 Aduna kini entry fee nga P200.  Matud pa ni CEPCA secretary ug sports committee chairman Jun Olis nga modawat sila og on-site registration.

 Alang sa dugang mga kasayoran, mahimong mokontak  ni FIDE Arbiter Marvin Ruelan sa 0926-7352951.