Rising Sun midemolis sa Don Bosco sa Aboitiz Football Cup
CEBU, Philippines - Gipahimuslan sa Rising Sun ang ilang kasinatian sa pagkudlit og 7-0 nga kadaugan batok sa Don Bosco United FC sa men’s open division sa 16th Aboitiz Football Cup niadtong weekend didto sa Aboitiz SportsField sa Brgy. Subangdaku sa Mandaue City.
Pagsugod pa lang, mipahungaw dayon sa ilang kainit ang Rising Sun aron mougkat og tulo ka goals sa unang-tunga sa duwa.
Nakaiskor sab ang Rising Sun defenders og dugang upat ka goals sa second half ug wala gyud motugot sa Don Bosco United FC nga makahimo’g bisan usa lang ka goal.
Sa laing aksiyon, ang Samba FC miiskor sab og 2-0 nga daog batok sa KTEC Training sa men’s open division.
Gisirohan sab sa Queen City United ang Nikoshi FC, 3-0 sa 38-above category, samtang giblangkohan sab sa St. Theresa’s College (STC) ang Cebu International School (CIS), 5-0 sa girl’s Under-18 class.
Sa Under-15 division, ang Sacred Heart School-Ateneo de Cebu (SHS-AdC) miiskor og 2-0 nga kadaugan batok sa Phoenix, ang Dynamo FC milansang sa ilang sunod-sunod nga daog batok sa DBTC sa Under-11 division ug ang DBTC midaog batok sa MALV, 5-1.
Ang CIS ug Giuseppe milupig sa DBTC-1 ug sa DBTC-C sa Under-9 division. (BANAT PALARO)
- Latest
