Baby Warriors abante sa NBTC finals

CEBU, Philippines - Gipukan sa University of San Carlos (USC) Baby Warriors ang University of the Visayas (UV) Baby Lancers sa iskor 89-78 kaniadtong Sabado aron moabante sa finals sa Seaoil National Basketball Training Center (NBTC) basketball tournament didto sa USC gym sa dan Sanciangko, ning dakbayan.

Human masakmit ang unang luna sa finals, magpaabot pa ang Baby Warriors sa modaug tali sa no. 1 seed Sacred Heart School-Ateneo de Cebu (SHS-AdC) Magis Eagles batok sa no. 4 Don Bosco Technology Center (DBTC) Junior Greywolves diin ang modaug maoy makigsangka batok sa Baby Warriors sa finals ugma.

Ang ma-champion dinhi sa Sugbo, molarga ngadto sa Manila aron makigsangka batok sa  Ateneo alang sa NBTC national finals.

Si Kevin Villagracia maoy nangu sa Baby Warriors sa iyang 29 puntos ug wala'y nakapugong kaniya pagdominar sa ilawom.

Ang kandidato na sab pagka MVP nga si Scott  Aying midugang og 16 puntos samtang si Ian Orocio dela Cruz miamot og 15 puntos.

Ang Baby Lancers sa laing bahin gipangulohan nilang Prince Cañete ug John Carl Escalona sa ilang 19 ug 18 puntos, matag usa.

Puntos matag usa:

USC (89)---   Villagracia 29, Aying 16, Dela Cruz 15, J. Ortega 7, J. Galinato 6, Y. Antigua 5,  J. Antigua 4, P. Galinato 2, Ting 2, Suelto 2, Malazarte 2.

UV (78)---Cañete 19, Escalona 18, Manzo 11, Cabahug 9, Villamor 8, Wamar 7, Limitares 4, Flores 2. (BANAT PALARO)