Ty kampiyon sa January edition sa CEPCA chessfest
CEBU, Philippines - Nagpadayon ang kainit ni Jimmy Ty Jr. human siya koronahi isip grand champion sa tinuig nga Cebu Executives and Professionals Chess Association dihang nanghawod kini sa January edition sa CEPCA monthly tournament niadtong Domingo didto sa Handuraw Pizza sa Gorordo Avenue, Cebu City.
Si Ty nga lumad taga Tacloban City, apan ania na magbasi sa Sugbu mitapos sa 5-round Swiss system competition nga may 4.5 puntos.
Gipangpilde niya silang Manny Manzanares, Jun Kidlat, Jerry Maratas ug Peterson Sia sa wala pa magkatabla ni Romy Pialan sa final match.
Sa maong kadaugan, si Ty nakakuha’g pasaporte alang sa grand finals unya sa Disyembre ug ingon man naghatag kaniya’g higayon sa pagpanalipod sa iyang titulo.
Si Manzanares maoy mipahiluna sa ikaduhang dapit nga adunay 4.0 puntos. Sila si Kidlat, Maratas ug Sia pulos mitanom og 3.0 puntos, apan si Kidlat maoy miani sa ikatulo pinasikad sa higher tie-breaker output. Si Maratas, ang bag-ong presidente sa CEPCA mitungtong sa ikaupat, gisundan ni Sia.
- Latest
