Spurs kaging sa Heat

CEBU, Philippines - Sa sinugdanan, usa kadto ka maanindot nga NBA Finals "rematch,"  apan lahi na didto sa second half, usa kadto ka "blowout" dihang milabaw og labing menos 25 puntos ang Miami Heat sa wala pa nila hingpit ipadaplin ang San Antonio Spurs,  113-101 kagahapon didto sa American Airlines Arena sa Miami, Florida.

 Mibahog og 24 puntos si Chris Bosh  aron pangulohan ang   Heat, kinsa miposte sa ilang labing dakung labaw nga 29 puntos sa maong duwa  sa sayong bahin sa fourth period.  Si LeBron James miamot og 18 puntos, samtang si Mario Chalmers midugang og 16 puntos alang sa Heat.

 Si Dwyane Wade, kinsa  mibalik na og duwa human mawala sud sa upat ka higayon tungod sa naghasol nga sakit sa iyang tuhod, miamot lang og otso puntos uban ang lima ka assists.

 Mihimo sab og double figures si Michael Beasley pinaagi sa iyang 12 puntos, si Norris  Cole adunay 11 puntos ug ang beteranong si Ray Allen mitampo'g 10 puntos alang sa  Miami nga nagbitbit na karon og 32-12 nga baraha.

 Si Tim Duncan maoy nangu, gisundan ni Boris Diaw nga adunay 15 puntos.  Silang Marco Belinelli ug Tony Parker miamot og 12 ug 11 puntos matag usa alang sa 33-11 nga Spurs.

 Wala makaduwa  silang Danny Green, Kawhi Leonard ug Tiago Splitter tungod sa piang.

 Ang Spurs igo pa lang napilde og upat sud sa 20 nila ka road games.

 Nakatabla ang Spurs sa iskor, 44-all, apan wala magdugay, hinay-hinay silang gilubong sa Heat.

 Gitapos sa Miami ang second quarter pinaagi sa 14-6 run ug na-outscore ang Spurs, 33-21 sa third period ug gisugdan sab nila ang fourth period og 13-4 run nga nakapalawom og maayo sa ilang labaw.

 Sa laing duwa, gipukan sa Golden State Warriors ang Portland TrailBlazers, 103-88,  ang Denver Nuggets milubong   sa Sacramento Kings, 125-117, gipilde sa Dallas Mavericks ang Detroit Pistons, 116-106.

 Midaog sab ang Brooklyn Nets batok sa Boston Celtics, 85-79, gipilde sa Phoenix Suns ang Cleveland Cavaliers, 99-90, gilubong sa New Orleans  Pelicans ang Orlando Magic, 100-82 ug ang New York Knicks  midaog batok sa Los Angeles Lakers, 110-103.