San Mig sud sa Final Four, Talk 'N Text natagak
CEBU, Philippines - Segurado nga adunay bag-ong koronahan nga All-Filipino Cup champion human gitagak sa San Mig Coffee Mixers ang defending champ nga Talk 'N Text Tropang Texters, 90-82, sa ilang 'do-or-die' game kagabii didto sa Cuneta Astrodome.
Ang point-guard ug kanhi national team cager nga si Mark Barroca maoy nangulo sa San Mig sa iyang 18 puntos, samtang ang mga bigmen nga sila si Marc Pingris ug Joe Devance nagkumboya og 27 puntos.
Sa maong kadaugan, ang San Mig makigsangka sa ilang igsuong koponan nga Barangay Ginebra San Miguel sa ilang 'best-of-five' semifinals series.
Nahimong sikit ang duwa tali sa duha ka koponan nga miresulta sa 55-all nga panagtabla sa 4:57 sa third period, apan mibuylo ang opensa sa Mixers sa katapusang minuto sa duwa sa pagpangulo nila ni Barroca ug Devance. Ang San Mig misegurado sa ilang daog sa katapusang 35.9 segundos, 89-82.
Impresibo ang daog alang sa San Mig bisan pa sa otso puntos ra nga produksyon sa ilang star player nga si James Yap kinsa adunay gihambin nga injury sa bukton.
Si Ranidel De Ocampo maoy leading scorer sa Texters sa iyang 22 puntos, gisundan ni Jayson Castro nga mihimo og 15 puntos, samtang si KG Canaleta mitira og 13 puntos.
PUNTOS MATAG USA:
SAN MIG (90) - Barroca 18, Devance 14, Pingris 13, Melton 12, Simon 10, Mallari 8, Yap 8, Sangalang 7, De Ocampo 0, Reavis 0
TALK 'N TEXT (82) - De Ocampo 22, Castro 15, Canaleta 13, Seigle 8, Alapag 6, Williams 5, Fonacier 5, Carey 5, Reyes R. 3, Aban 0, Peek 0, Reyes J. 0, Baclao 0 (BANAT SPORTS)
- Latest
