Heat naglisud pagdaog sa Lakers

CEBU, Philippines - Naglisud ang Miami Heat pagpukan sa piangon nga Los Angeles Lakers ug igo lang kining midaog og siyete puntos, 109-102 sa ilang duwa sa NBA kagahapon didto mismo sa kaugalingong balwarte sa American Airlines Arena sa Miami, Florida.

 Buynas kaayo si Chris Bosh diin mipasud kini sa katapusan niyang walo ka sunod-sunod nga tirada  aron pangulohan ang Heat. Si Bosh mibagdok og 31 puntos, samtang  sa LeBron James midugang og  27 puntos uban ang 13 ka rebounds.

 Silang Mario Chalmers ug Norris Cole parehong miamot og 11 puntos  alang sa Heat, kinsa midaog na og walo ka higayon sa siyam ka sangka batok sa Lakers. Ang beteranong si Ray Allen mitikdol og 10 puntos.

 Ang Lakers gipangulohan nilang Pau Gasol ug Jodie Meeks nga mihakot og 22 puntos matag usa, gisundan ni Nick Young nga adunay 19 puntos.

 Didto sa Portland, si LaMarcus Aldridge mikulit og  career-high 44 puntos aron pangulohan ang TrailBlazers nga midaog batok sa Denver Nuggets sa iskor nga 110-105.