George nangu sa Pacers

CEBU, Philippines - Lain na sab nga makapa-inat sa kilay nga performance ang gihimo ni Paul George kinsa maoy nagtimon sa Indiana Pacers ngadto sa 106-92 nga kadaugan batok sa Los Angeles Clippers nga naglakip og duha ka 360-degree reverse windmill dunks.

Ang maong dunk nakapahimuot og maayo sa mga Pacers fans samtang ang mga stars sa Lob City (Clippers) nagbarug nga daw gipang-ugbok nga kandila.

''It was just instinctive. I wanted to put on a show for the fans,'' matud pa ni George kinsa maoy nangu sa Pacers aron putlon ang five-game win streak sa Clippers.

Nagpakita og maayong agi ang Pacers karon nga season kinsa adunay 32-7 nga baraha ug maoy nanag-iya sa best record sa NBA ug labing maayong home record sa ilang 21-1 aron maglabaw og tulo ka duwa ug tunga batok sa Eastern Conference ug two-time defending champion Miami.

Ang highlight-reel dunks ni George ug ni Lance Stephenson mao na karo'y kasagaran makita isip ilang normal routine.

Dihang naglabaw na sila'g 20 puntos ug padulong na sa ilang basket si George, kalit siyang milayat ug mituyok sa hangin ug gilambos ang bola ginamit ang usa ka kamot ug nangusog ug maayo sa iyang pagtugpa dayong dagan balik sa pikas korte aron modepensa.

Si George kinsa maoy Most Improved Player sa miaging tuig, aduna nay unom ka 30-point games ug 27 ka 20-point games karon nga season.

Ang 23 anyos nga si George na karo'y bag-ong misubang nga usa sa leading scorers sa NBA, free throw percentage ug sa steals ug posible pa gani unta nga mas taas nga rebounds kung dili pa lang unta nila lubngon kanunay ang ilang kontra.

''I just wanted to celebrate. I didn't want to get back on defense. I've not seen one like that in a game I've been in,'' matud pa ni Stephenson.

Na-ejected sa maong duwa ang power forward nga si David West atol sa halftime human siya tawagi og flagrant 2 foul.

Nakahimo sab si George sa maong duwa ug 12 of 17 gikan sa field, 5 of 6 sa three-pointers ug 7 of 7 gikan sa free throw line. 

Si Jamal Crawford maoy nangu sa Clippers sa iyang 22 puntos samtang midugang og 19 puntos si Blake Griffin ug may 12 puntos si DeAndre Jordan. Ang Clippers naghupot karon og 28-14 nga baraha.  (GGM)

''We didn't play well at all. I thought their defense really rushed us. We talked about how they tried to channel you into their bigs and we kept falling for it over and over again. We just didn't execute offensively,' matod pa ni Clippers coach Doc Rivers.' (GGM)(BANAT NEWS)