Nahagtos

CEBU, Philippines - Gibugto sa  Charlotte Bobcats ang lima ka nagkutay'ng daog sa New York Knicks  pinaagi

  sa pagpilde niini sa iskor nga 108-98 sa National Basketball Association kagahapon didto sa Charlotte Bobcats Arena sa North Carolina.

 Ang sentro sa Bobcats nga si Al Jefferson, kinsa adunay hubag sa tuong tikod,  mirehistro og season-high 35 puntos.

 Nakakuha sab dakung suporta gikan ni Kemba Walker, kinsa miamot og 25 puntos, diin 12 niini iyang nahimo sa final period.

 Mao kadto'y labing maayong duwa ni Jefferson sukad siya mibalhin sa Bobcats isip usa ka free agent sa miaging off-season diin mipirma siya'g tulo ka tuig nga kontrata nga balor og  $41 million.

 Kun dili madominar ni Jefferson ang ilawom, ipasa   dayon niya ang bola ngadto sa gawas, ang nakanindot kay   debuynas sab ang iyang mga kauban, kinsa nangigo sa three-point territory. Ang Bobcats nakahimo og unom sa ilang 14 ka  attempts gikan sa three-point arc.

 Si Walker mihimo'g 4-of-4 sa field sa fourth quarter, lakip ang pipila niya ka triples. Gawas sa iyang puntos, mihimo sab siya'g pito ka rebounds ug lima ka assists.

 Nakabatang sab sa Bobcats ang pagbalik ni Michael Kidd-Gilchrist, kinsa miamot og otso puntos ug pito ka rebounds. Wala makaduha sud sa 19 ka higayon si Gilchrist tungod sa piang sa  iyang walang kamot.

 Si Carmelo Anthony maoy nangu sa 15-23 nga Knicks sa iyang 20 puntos ug unom ka rebounds.

 Mibalik na'g duwa si  Tyson Chandler human makasinati og bronchitis, apan wala siya kaayo makahuygo ug igo lang  miiskor og singko puntos ug upat ka rebounds.

 Sa laing mga duwa, ang Cleveland Cavaliers naka-eskapo batok sa Los Angeles Lakers, 120-118, nakaipsot sab ang Memphis Grizzlies batok sa Oklahoma City Thunder, 90-87 ug ang  Indiana Pacers milubong sa Sacramento Kings, 116-92. (BANAT NEWS)