Heat, Pacers midaog OKC daog sab. Durant mihagdaw og 48 puntos

CEBU, Philippines - Gipangulohan nilang Dwayne Wade, Chris Bosh ug Rashard Lewis ang Miami Heat ngadto sa 110-94 nga kadaugan batok sa Orlando Magic kagahapon didto sa Amway Arena sa Orlando, Florida.

Parehong mibahog og 20 puntos silang Wade ug Bosh ug midugang pa gyud si Lewis ug 18 puntos dihang mi-rally ang Heat aron pagpukan sa Magic.

Mao lang kadto'y ikaduhang pagduwa ni Lewis isip starter ug siya maoy mipuli kang Shane Battier sa starting line-up tungod kay adunay piang si Battier ug gipapahuway tungod sa naghubag nga quadriceps nga usa ka dakong "muscles" sa paa.

Igo lang miamot og 15 puntos uban sa iyang walo ka assists ug walo ka rebounds si LeBron James sa maong kadaugan.

Mao na kadto'y ikawalong sagunson nga kadaugan sa Heat batok sa Magic ug mao sab ang ika-22 nga divisional victory sa Heat ug usa nalang ka daog sa Southeast Division aron motabla sa NBA record nga gihimo sa Boston nga 23 ka daog  kaniadtong  1961.

Didto sa Indianapolis, midaug sab ang Pacers batok sa  New Orleans Pelicans sa iskor, 99-82.

Ang  Pacers maoy kanunay biya sa first half apan migamit sila'g hugot nga depensa batok sa Pelicans aron maka-eskapo didto sa ilang homecourt.

Si Paul George maoy nangu sa Pacers sa iyang 24 puntos uban sa 10 ka rebounds. Kanunay lang lutsan ni Eric Gordon ang Pacers hinungdan nga ang kanhi  Indiana University star mi-iskor og 17 sa iyang 21 puntos ug kadaghanan nga drive.

Laing Pacers nga mi-iskor og double figures gawas kang George mao silang Lance Stepenhon kinsa may 19 puntos, Danny Grange kinsa miamot og 13 puntos ug si George Hill kinsa miambit og 10 puntos.

''He's a tough matchup,'' matud pa sa 6-9 nga si George kalabot kang Gordon.

Si Alexis Ajinca mi-iskor og season-high 17 puntos alang sa Pelicans samtang sila si Tyreke Evans ug Anthony Davis midugang og 12 ug 10 puntos, matag usa.

Ang shooting  forward sa Pelicans nga si Ryan Anderson pabilin pa gihapapon didto sa ospital sa Boston human sila magkabangga ni Gerald Wallace kaniadtong Biyernes. Tulo ka sakop sa  Pelicans ang gitawagan og technical fouls atol sa maong duwa batok sa Pacers — usa kang  Davis, Jrue Holiday ug laing usa sa ilang assistant coach nga si Dave Hanners.

Didto sa Minneapolis, gitabangan og depensa nilang Kevin Love ug Nicola Pekovic si Kevin Durant  apan ang scoring leader sa NBA nakahimo lang gihapon paghakopt og season-high 48 puntos aron baswaton ang Oklahoma City Thunder ngadto sa 115-111 nga kadaugan batok sa Timberwolves.

Mihimo'g 23 puntos si Durant sa fourth quarter aron pangulohan ang mainitong rally sa Thunder ug human niya tablaha ang duwa sa 111-all pinaagi sa iyang jumpshot, siya sab maoy nagselyado sa kadaugan pinaagi sa duha niya ka free throws.

''I just hear a lot of stuff and I just wanted to come through for my team in the fourth quarter,'' sumala pa ni Durant nga nakadungog og daghan matang sa trash talk gikan sa bench sa Timberwolves.

Si Love kinsa mihipos og 30 puntos, miduwa sa kinatibuk-ang second half ug nakita ang iyang kakapoy dihang misipyat siya sa iyang duha ka free throw ug iyang gituyo og sipyat ang ikatulong tirada apan illegal ang maong lakang human lang siya makakubit og foul gikan sa three-point area gikan ni Durant diin ang maong three-point play opportunity mao untay posibleng mohatag og seguradong kadaugan sa Timberwolves.

''I was more upset about the first one I missed. I left it short. I think they were flat and short. There was no real air under them. Just missed them,'' matod pa ni Love kinsa migakos kang Durant human sa duwa aron pagpakita sa iyang sportsmanship.

Ang Thunder nabiyaan og 13 puntos, 77-90 sa wala pa mobuto si Durant. (BANAT PALARO)