Weidman nakadepensa, nabali ang tiil ni Silva
CEBU, Philippines - Milampos ang Amerikano nga si Chris Weidman sa pagdepensa sa iyang middleweight title, apan sa dili kasarangang paagi dihang naundang ang ilang away human mabali ang tiil sa iyang kontra ug Brazilian superstar nga si Anderson Silva kagahapon sa Ultimate Fighting Championship didto sa Las Vegas, Nevada.
Sa usa sa mga giatangang rematch sa combat sports karong tuiga, si Weidman mipakita sa iyang abilidad sa wrestling aron dad-on ang away sa ground batok ni Silva, apan mipakita og kalig-on ang kanhi kampiyon nga milahutay sa second round.
Apan sa ikaduhang round nahitabo ang usa ka makapakurat nga panghitabo dihang nabali ang walang tiil ni Silva human siya ra usab ang mipatid sa tuhod ni Weidman.
"There's no real excitement in a fight finishing like that, because you never want to see anyone get hurt like that," matud pa ni Weidman sa Associated Press. Si Weidman pabiling walay pilde sud sa 11 ka away.
Sa maong kapildehan ang kanhi undisputed champion nga si Silva posible nga moretiro sa Mixed Martial Arts ilabi na nga nagpangedaron na kini og 38-anyos.
Si Weidman misaka karon isip usa sa mga ngilngig nga kampiyon sa MMA. Siya usab ang responsable sa usa sa mga sakit nga kapildehan ni Fil-American fighter Mark Muñoz karong tuiga.
- Latest
