Yaw-Yan fighters moaway karon alang sa Pinas

 CEBU, Philippines -  Dungog alang sa nasud nga Pilipinhon maoy puntariya sa duha ka fighters gikan sa Cebu-based Yaw-Yan ArDigma Martial Arts Federation sa ilang pakigsangka sa mga Amerikanong kaatbang sa "Knuckle Up" didto sa Vallejo, California.

 Sila si Yaw-Yan Fighting Challenge Championship (YFCC) junior lightweight king Renan 'Limbas' Noblefranca ug undefeated Jordan 'Labuyo' Balcita moatubang  karon sa tagsa-tagsa ka hagit batok sa mas dagku nga kontra.
 Gibansay ni Yaw-Yan ug CEO Master Benigno 'Ekin' R. Caniga Jr. uban sa iyang anak nga si Johnlery Caniga, sila si Noblefranca ug Balcita modala karon sa bandila sa Pilipinas uban ang paglaum nga mohimo'g impresibong kadaugan.
 "Importante gyud kaayo ni nga away dili lang nako pero apil na pud sa Yaw-Yan ArDigma-Cebu tungod kay naa ko'y chance nga ipakita ang abilidad nga labaw pa sa akong kontra," matud pa ni Noblefranca.
 "Kini ang right time aron mapakita nato sa tibuok kalibotan nga aduna ta'y kapabilidad nga mo-produce og mga world class fighters," sumala pa ni Master Ekin.
 Sama ni Noblefranca, si Balcita nagpanikad na usab sa iyang sangka. Si Balcita mipaundang ni URCC veteran Johnjier Torbiso sa second round sa ilang sangka unom na ka buwan ang milabay didto sa Artemio Masbate Sports Complex sa San Remigio, Cebu.
 "Karon pa nato mahibaw-an kun kinsa ilang mga kontra pero segurado ko nga mga American Muay Thai fighters sila," segun pa ni Johnlery Caniga, kinsa usa usab ka international MMA champion.   (BANAT PALARO)