4Cents 3rd strike chess tournament sugdan karon
CEBU, Philippines - Masukod na sab ang kalantip sa pangisip sa mga chess players dinhi sa Sugbu sa ipahigayong Four Central Squares (4Cents) 3rd Strike Open Chess Tournament sugod karong adlawa diha sa Robinson Cybergate sa Fuente Osmeña, ning siyudad.
Ang unang adlaw sa kompetisyon alang lamang sa kiddies (14-anyos ug paubos) samtang ang open category inig ka ugma na.
Ang National Chess Federation of the Philippines (NCFP)-rated tournament mosubay og 7-round Swiss system format gamit ang game point scoring system.
Ang kampiyon sa open division mobulsa og P4,000 ug tropeyo, ang second placer makadawat og P3,000 ug ang third makaangkon og P2,000. Ang fourth ug fifth placers gantihan og P1,000 matag usa.
Mopahiluna gikan sa ikaunom hangtod sa ika-10 nga dapit makadawat og consolation prize nga P500 matag usa ug ingon man ang top female entry.
Sa laing bahin, ang top performer sa kiddies class makadawat og P3,000 ug tropeyo, ang ikaduha makaangkon og P2,000 ug ang mopahiluna sa ikatulo mobulsa og P1,000. Ang ikaupat ug ikalima makadawat og P300 matag usa.
Makadawat og consolation prize nga P300 matag usa ang mopahiluna gikan sa ikaunom hangtod sa ika-10 nga dapit. Ang top female entry makaangkon og P500.
Ang registration fee nagkantidad og P150 alang sa kiddies ug P200 sa open.
Alang sa dugang pang mga kasayoran, mahimong mokontak ni tournament director Eduard de la Torre sa 0932-8622010 ug FIDE Arbiter Felix A. Poloyapoy Jr. sa 0933-6642958. (BANAT PALARO)
- Latest
