Barako Bull misungag sa Meralco

CEBU, Philippines - Pabiling buhi ang paglaum sa Barako Bull Energy Cola alang sa luna sa playoffs human nila gipagngan ang Meralco Bolts, 99-86, kagahapon sa PBA Philippine Cup didto sa SM Mall of Asia Arena.

Human sa ilang sakit nga 80-87 overtime nga kapildehan batok sa Talk ‘N Text Tropang Texters, ang Barako Bull daling mibangun aron lubngon ang Meralco.

Sa maong kadaugan ang Barako Bull mipalambo sa ilang record ngadto sa 3-6 diin nakigtabla sila sa Alaska Aces ug Meralco. Ang tulo ka koponan maningkamot nga mudaog sa sunod nilang mga duwa aron likayan nga sayung mataktak sa elimination uban sa Air21 Express (1-7).

Ang veteran guard nga si Dennis Miranda ug JC Intal maoy nagpasiugda sa scoring rally sa Barako Bull nga misira sa first half dala ang 11 puntos nga labaw, 50-39.

Nagpadayon ang init nga atake sa Barako Bull sa third period ning higayuna ubos sa paningkamot nila ni Willie Miller ug Mick Pennisi kinsa mipauwan og three-point shots.

Gikan didto wala na gyud kaduol pa ang Meralco dihang gipabuthan usab sila pag-usab ni Pennisi og tres nga  miinat sa labaw ngadto sa 81-66 sa katapusang 9:45 sa duwa.

Si Miranda maoy leading scorer sa iyang 17 puntos, samtang sila si Pennisi ug Miller adunay 14 puntos matag usa. Nangulo sa pilderong Meralco mao si Gary David ug Mike Cortez nga nagkumboya og 40 puntos. (BANAT NEWS)