White, Maroon mag-abot sa finals sa SRP Sunday Club

CEBU, Philippines -  Natinuod ang mga panagna sa kadaghanan nga ang White ug Maroon maoy mag-ilog sa SRP Sunday Club Christmas League 2013 title kini human sa ilang managlahing kadaugan batok sa tagsa-tagsa nilang karibal niadtong Domingo didto sa San Roque Parish gym sa Brgy. Subangdaku, dakbayan sa Mandaue.

 Nakuha sa White ang katapusang  lingkoranan sa finals pinaagi sa paglubong sa Violet sa iskor nga 78-67, samtang ang Maroon mitagak sa defending champion Blue human makaipsot, 76-75.

 Gipakita ni ex-UV Lancer Rene Grafe nga wala pa matay-i ang iyang kahait sa opensa dihang gipangulohan niya ang White pinaagi sa paglansang og 25 puntos, diin 14 niini iyang nahimo sa second half.

 Gawas sa mga puntos ug assists, gidominar sab ni Grafe ang rebounding department diin milangkat siya og 16 ka rebounds alang sa White nga milabaw og 10 puntos, 25-15 sa nahabiling 1:40 sa second period.

 Misikit sa makadiyot ang Violet, 46-48 gikan sa 3-point shot ni Eddie C. Amora sa katapusang 3:10 sa third quarter.

 Sa pagpangulo ni Grafe, ang White miinat og balik sa ilang labaw ngadto sa nuybe puntos, 59-50 paghuman sa maong kuwarter. Mikompiyansa ang  White sa final period samtang ang Violet hinay-hinay sab  nga mikitkit sa labaw hangtod nakatabla, 67-all sa basket ni Ronnie Alvarado sa katapusang 4:00 sa duwa. Ang nakapait kay nalansang sa 67 ang iskor sa Violet ug wala na kini moirog pa hangtod nahuman ang duwa.

 Gawas ni Grafe, si Ohing Ortis mihimo sab og double figures pinaagi sa iyang 14 puntos, samtang si Glen 'Dodod' Colina mikabya og 10 puntos.

 Nangulo sa Violet mao si Alvarado, kinsa mipabuto'g 22 puntos, gisundan ni Joel Aniño sa iyang 18 puntos.

 Sa laing bahin, si Marcial Marturillas miiskor og nuybe sa fourth quarter alang sa kinatibuk-an niyang 12 puntos aron maoy mangulo paglingkawas sa Maroon gikan sa peligrong sitwasyon.

 Ang Blue gipangulohan ni Dante Orendain pinaagi sa iyang 29 puntos, apan nausik lang ang iyang mga paningkamot kay wala makahatag og dakung suporta ang iyang kaubanan.

 Ang "knockout" finals tali sa  White ug Maroon himuon karong Domingo sa alas-10 sa buntag human sa duwa sa Blue ug Violet nga mag-ilog alang sa ikatulong dapit nga gikatakda sa alas-9 sa buntag.

 Ang SRP Sunday Club gidumala sa ilang presidente nga si Rom Castañeda.

 Ang mga duwa gidumala ni league commissioner Monching Menaling uban sa abag nilang Juvenal Perolino, Van-Van Amora, Zaldo Montayre, Paul Miñoza ug Pedro Montayre.

 Gawas ni Castañeda, lain pang mga opisyales sa SRP Sunday Club ning tuiga naglakip nilang  Jun Atillo  (vice president), Ruben  Flores  (secretary), Glenn Castañeda (treasurer), Arnold Aventajado  (auditor)  ug   Nonoy Amora   ug  Melio   Colina    (PROs).

 Si Mandaue City Vice Mayor  Glenn Bercede maoy ilang adviser ug Amay Dy.

 Ang tinuig nga liga gisuportahan sab  ni  Subangdaku Brgy. Capt. Ernie Manatad.

PUNTOS MATAG USA

Unang duwa:

 MAROON (76) -  Marturillas 12, Aton 9, Dumans 8, Supangan 8, Cubero 7, Tecson 7, Aposaga 6, Dy 4, Velasquez 4, Castro 2.

 BLUE (75) - Orendain 29, Colanse 9, Enriquez 8, Anghay 8, Labares 6, Paldo 5, Fontanosa 4, Alesna 2, Gonzaga 2.

Ikaduhang duwa:

 WHITE (78) - Grafe 25, Ortiz 14, Colina 10, Obenza 8, Sagayno 6, Cabcaban 6, Abatayo 6, Cariño 3.

 VIOLET (67) - Alvarado 22, Aniñon 18, Amora 7, Pelarios 4, Pilapil 4, Fick 4, Arreglo 4, Migallen 4, Caballero 2, Ouano 2, Melencio 2.