Chiongbian, Uy misidlak sa RP national duathlon

CEBU, Philippines -  Garbo sa Sugbu nga sila si Justin Chiongbian ug Shaia Ruth Uy nga pulos mga tinun-an sa Sacred  Heart  School-Ateneo de  Cebu (SHS-AdC) ang nidominar  sa  mini  sprint  race sa 2013 Philippine National Duathlon Championships sa miaging  adlaw   didto   sa    Remy Field  sa  Subic  Bay Freeport.

 Nadepensahan ni Chiongbian ang iyang titulo sa boys division human niya gitapos ang lumba sa oras nga 40 minutos ug 16.06 segundos ug nagpakita nga nabalik na ang iyang naandan nga katakus human sa dili maayo niyang kasinatian sa duathlon sa miaging bulan.

 Si Uy sa iyang bahin, halandumon ang  una niyang pagsalmot sa duathlon dihang gikoronahan siya isip labing  paspas sa girls division  sa oras og 46:13.83.

 Gumikan sa ilang impresibong kadaugan, sila si Chiongbian ug Uy giplanohan sa Triathlon Association of the Philippines (TRAP) nga ilakip sa training pool sunod tuig.

 Gawas sa duha ka Sugbuanong mga atleta, ang lain  pang age-group winners sa maong kompetisyon nga gipasiugdahan sa TRAP mao silang Raven Archer (18-19), Carlo Maniebo (20-24), Christopher Iblan (25-29), Francis Carlo Serrano (30-34), Dejan Glavnik (35-39), Raul Gaerlan (40-44), Jamie Leather (45-49), Arsenio Malibiran (50-54), Josef Gueta (55-59) ug Killy Kunimoto (60-over), Humma Saeed (20-29), Josette Tanghal (30-39) ug Lyka Leather (40-over). (BANAT NEWS)