Gray team kampiyon
CEBU, Philippines - Dili matupngan ang gibating kalipay sa Gray team human makaipsot batok Blue team, 71-69 aron maghari sa basketball event sa House of Hope Christian Drug Rehabiltation Ministry Sportsfest 2013 didto sa Barangay Gun-ob gym, sa dakbayan sa Lapu-Lapu.
Sa gihapon, si Lemuel Cahig mao na sab ang nangulo sa Gray, kinsa nakalingkawas sa huego-todo nga duwa.
Si Cahig nga maoy napiling MVP miarangkada og 21 puntos, gisundan ni Nelson Aguilar nga miratsada'g 16 puntos. Nakakuha sab sila og igong suporta gikan nilang Paulo Gabiana ug Perry Dayupay nga mikimada'g 11 ug 10 puntos matag usa.
Gipangulohan sab ni Gino Amodia ang Blue team nga mikulit og 20 puntos. Si Vanvan Gonzales mitimbre og 19 puntos, samtang si Dodoy Bartolome mitikdol og 13 puntos alang sa Blue team nga wala makalahutay sa kabangis sa Gray team.
Sa pasiunang duwa, gipilde sab sa Yellow team ang Red team sa iskor nga 50-40 aron sakmiton ang ikatulong dapit.
Si Mark Qua mikadlit og 19 puntos aron pangulohan ang Yellow team, samtang sila si Dale Cabanig ug Michael Buico mipugnit og 11 puntos matag usa.
Sila lang si Jay Adolfor ug Niloy Lequin ang mihimo'g double figures alang sa napildeng Red team.
Ang liga nahimong posible pinaagi sa mga paningkamot ni league commissioner Nelson Aguilar uban sa abag nilang Gino Amodia, Ruel Allocod ug Joselito Diores.
Puntos matag usa
Unang duwa:
(for third place)
YELLOW (50) - Qua 19, Cabanig 11, Buico 11, Cabarrubias 6, Genzon 3
RED (40) - Adolfor 14, Lequin 12, Allocod 8, Nabaunag 4, Manco 2
Ikaduhang duwa:
(championships)
GRAY (71) - Cahig 21, Aguilar 16, Gabiana 11, Dayupay 10, Arnado 9, Federicos 4
BLUE (69) - Amodia 20, Gonzales 19, Bartolome 13, Darrell 9, Maceren 8 (BANAT NEWS)
- Latest
