Mubo apan eleganteng opening ceremonies
CEBU, Philippines - Mubo apan elegante nga opening ceremonies ang mahitabo sa 5th Milo Little Olympics National Finals karong hapon diha sa Cebu City Sports Center.
Lahi sa unang pag-host sa Sugbu sa maong multi-sports event, walay makitang fireworks sa kalangitan, apan si Ricky Ballesteros misaad nga masurprisa ang 1,600 ka mga atleta ug coaches ug ingon man delegation officials lukop nasud.
"We will be going to present Milo for the past 50 years plus the golden years of sports. We will also show Milo's contribution in sports as well as the history of the Milo Little Olympics. We will present it by decades through dances and music," matud ni Ballesteros.
Ang MLO nagsugod niadtong 1988 didto sa Manila ug gidala dinhi sa Sugbu alang sa Visayas region sa tuig 1996, dayon gidala sa Cagayan de Oro City sa Mindanao pagka sunod tuig ug dayon sa Luzon.
Human sa upat ka regional championships -- Luzon, Visayas, Mindanao ug National Capital Region (NCR), ang Nestle Philippines nakahukom nga ipahigayon ang "battle of the champions" dinhi sa Sugbu niadtong 2009.
Ang National MLO anaa na karon sa ikalimang edisyon ug daku kini'g natabang sa grassroots development program sa nasud.
Gawas sa presentation, angay sab atngan ang "lighting of urn" ni Don Bosco Technology Center skipper Angelo Alforque. Iyang pasilaabon ang urna pinaagi sa pagpatid sa bola gikan sa centerfield ngadto sa urna. Abagan siya nilang national team players Glenn Ramos, Mario Ceniza ug Alex Ballesteros.
Molamas sab sa kalihukan mao ang upat ka kanhi MLO beauties nga sila si Mutya ng Pilipinas Sharon Angel nga morepresentar sa NCR, Miss World Philippines second runner-up Claudine Amman alang sa Luzon, Sinulog Festival Queen April Smith sa Mindanao ug Frances Ayn Abella alang sa Visayas. (BANAT PALARO)
- Latest
