Aguilar milupig sa Adlawan sa 10th leg

CEBU, Philippines -  Gipakita ni Glenn Aguilar   nganong siya ang No.1 rider sa nasud dihang iyang gilupig ang multi-titled nga si Jon-jon Adlawan aron maangkon ang titulo sa international category sa 10th leg sa Kopiko   Astig 3-in-One supercross series sa miaging adlaw  didto sa Dumaguete City.

 Ang veteran rider nga si Rhowell Mangosong IV mipahiluna sa ikatulo, gisundan sa Danish rider nga si Emil Jepsen nga nahimutang sa ikaupat, samtang ang Sugbuanong rider   nga si Jubenile Abellar  mikapyot sa ikalima.

 Namawi hinuon si Mangosong dihang iyang gidominar ang pro lite title batok sa langyaw'ng rider nga si Decazi Balazs, samtang si  Aguilar napunta sa  ikatulong dapit.

 Naghari sab si Jepsen ubos sa intermediate division, si Jougeen Basco maoy labing paspas sa novice open production, si Christopher Bandigan  hari sa beginners open, samtang si Jed Luna midaog og duha ka titulo pinaagi sa local ug open enduro ug  si Pia Gabriel maoy reyna sa women’s class.

 Mokompleto sa lista sa mga mananaog mao sila si Keith Abrenica (peewee 50cc), BJ Pepito (peewee 65cc), Mclean Aguilar (mini), Felson Ray Baculpo (underbone), Tristan Galanto (veteran C), John Fernandez (veteran B) ug Dexter Bacabac (veteran A). (BANAT NEWS)