Rios di kaabot 5- rounds
Karong adlawa mahibaw-an kun masulod pa ba gihapon sa mga top contenders sa boksing ang pambato sa Pilipinas nga si Manny Pacquiao.
Daghan kaayo ang nakuryoso karon kun unsay ipakita ni Pacquiao ilabi na niadtong kuwang sa bilib sa Pambansang Kamao bisan pa man siya lang sa kasaysayan sa boksing nga nakahupot og walo ka titulo sa walo ka weight divisions.
Una kita mopadayon, atong balikan ang duha ka uwahing sangka ni Pacquiao kontra nila ni American Timothy Bradley ug Mexican Juan Manuel Marquez.
Sa sangka nila ni Bradley, kontrobersyal ang kapildihan ni Pacquiao kay sa mata sa kadaghanan (dili sa mga judges), ang kanhi pound-for-pound king nga si Pacquiao maoy midominar sa away. Sa maong sangka, makita nato nga si Pacquiao maoy nagpunay og ataki kang Bradley.
Apan tungod kay gi-expect man nga mapakatulog ni Pacquiao si Bradley daw naimpluwensyahan ang desisyon sa mga hurado sa ilang kaugalingong paghukom.
Samtang sa ilang sangka ni Marquez sa ikaupat ka higayon, nakita nga mas kusgan ug mas peligro si Pacquiao kun itandi kang Marquez. Bisan na-knockout pa ni Marquez si Pacquiao. Pildihunon unta si Marquez niadtong tungora ug labing dugay, ang 7th round, apan nasobrahan ang "gigil" ni Pacquiao ug nahimong careless, nasugamak hinuon sa left cross ni Marquez.
Sa duha ka mga sangka, wala ko'y pagduda sa abilidad ni Pacquiao, busa karon, sa iyaha gihapon nako ipusta ang akong pagsalig.
Si Rios nanghudlat nga usa siya ka “monster" sa ila unyang pag-atubang ni Pacquiao. Nindot ni tan-awon "Juan dela Cruz vs Monster."
Mibahad si Rios nga iyang tapuson ang karera sa boksing ni Pacquiao. Dili nato siya mabasol tungod kay uhaw siya sa kadaugan ilabi na batok sa usa ka sama sa kalibre ni Pacquiao.
Duna sab siya'y katungod nga moangkon niini kay kausa pa kini mapilde. Ikatulo, isog siya.
Apan sa akong tan-aw dili paigo ang kaisog aron ka makadaog ilabi na kun ang imong makaatbang kaparehas ni Pacquiao. Sila si Bradley ug Marquez migamit gyud sa ilang utok aron tugpangan ang estilo ni Pacquiao maong milampos sila.
Kun dili magmatngon si Rios hayan dili siya makaabot og five rounds, ilabi na sa iyang estilo nga pabara-bara ug magduko nga daw "toro" nga baka.
Kini maoy usa sa labing kinaham sa uppercuts ni Pacquiao. Ang makahadlok lang niini, kun magdali-dali na usab si Pacquiao sama sa gibuhat niya kang Marquez, kinahanglang i-maintain ni Pacquiao ang tempo hangtod nga mohumok ang depensa ni Rios.
* * *
PAGTULON-AN: Sumala pa sa Bibliya, mas maayong tudloan ang tawo nga mangisda nungka anaron sila paghatag og isda.
* * *
PAHIBALO: Gipahibalo ang mga sakop sa Alpha Sigma Omega International Collegiate Service Fraternity and Sorority (SIOUX) sa Northern Cebu nga moduaw karon ang GSAC sa inyong mga dapit aron maghatod sa mga relief goods. Palihug pakig-coordinate sa inyong chapter officers.
- Latest
