Cebuano triathletes gilaumang mosalmot sa PNDC 2013

 CEBU, Philippines - Mga batan-ong triathletes dinhi sa Sugbu ang gilaumang mopakita sa ilang katakus sa ipahigayong Philippine National Duathlon Championships 2013 karong  Disyembre 1 didto sa Subic Bay Freeport tungod sa makadani nga tanyag nga maangkon sa mga top performers.

 Ang Triathlon Association of the Philippines (TRAP) nagtanyag og luna sa national  duathlon team alang sa mga batan-ong partisipante nga mopakita'g maayong labok sa junior sprint ug youth mini sprint categories.

 Ang mga entrante sa junior sprint magtigi sa 5km-run, 12km-bike ug laing 2.5km-run, samtang ang mga partisipante sa youth mini sprint magbangga sa 2.5km-run, 12km-bike ug 2.5km-run.

 Gawas pa niana, libre ang tanang bayranan sa biyahi ngadto sa international duathlon event sud sa Southeast Asia sunod tuig ang nagpaabot sa top male ug female standard distance  age-groupers ning maong   event  nga   gipaluyohan sa    Subic  Bay Metropolitan Authority    (SBMA) Tourism    Department,   Standard Insurance, Asian Centre for   Insulation   Philippines Inc., Gatorade, David's Salon, Fitness First, Lifestyle Subic Bay ug Green Triathlon.

 Sa pagka karon, dul-an na sa 200 ka mga entries ang nagparehistro sa PNDC.

 Niadtong wala pa makaparehistro, ang mga interesadong mosalmot mahimo pang magparehistro hangtod sa Nobiyembre 25 sa entry fee nga P2,500 alang standard distance ug P2,000 sa sprint ug mini sprint participants.

 Matag finisher makadawat og finisher's medal, official race t-shirt ug post-event meal.

 Alang sa dugang pa nga mga pakisayod kabahin sa maong kalihukan, mahimong motawag  sa  TRAP  sa  mga numero   399-6598, 710-8259, 0917-5776070  o email sa [email protected] ug [email protected] (BANAT PALARO)