USC Passerelle sa Milo BEST national finals

CEBU, Philippines - Nagtinguha karon ang University of San Carlos (USC) Passerelle team nga langkaton ang titulo sa BEST SBP Passerelle Twin Tournament 2013 nga himuon karon ug ugma didto sa University of Assumption gym sa San Fernando, Pampanga.

 Ang USC maoy kampiyon sa     Visayas  Regional   finals sa miaging buwan nga gipahigayon  didto   sa    Bacolod.

 Ilang ikasangka didto sa Pampanga ang mga lig-on nga high school teams dinhi sa nasud lakip ang title favorite Chiang Kai Shek sa Metro Manila, Ateneo de Davao (Mindanao champion) ug ang Angeles University Foundation (Luzon champion).

 Ang Chiang Kai Shek maoy paborito nga mosakmit sa titulo human sa ilang pagdominar batok sa mga teams sa Metro Manila finals.

 Hinuon, wala makurat ang USC ubos ni coach Britt Carlo Reroma ug maoy ilang tinguha nga moiskor og dakung upset.

 Taud-taud nang wala makabalik sa national finals ang USC Passerelle team, apan karon ubos ni coach Reroma, nagpakita na sab sila og dakung katakus dihang ilang gipangpukan ang mga lig-ong koponan dinhi sa Sugbu.

 Ang USC katapusang miabante sa national finals niadto pang 2005.

 Ang USC magsalig nilang John Galinato, Jean Jacque Antigua, Marc Ting, Kent Malazarte ug Scott Aying, ang MVP sa Cebu leg.

 Sa SBP division, ang defending national champion University of St. La Salle-Bacolod nagtinguha sab nga mosakmit og "back-to-back" title. (BANAT PALARO)