Holy Trinity nakalingkawas sa STI College sa PCCL
CEBU, Philippines - Gipahimuslan sa Holy Trinity College (HTC) Wildcats sa General Santos City ang init nilang opensa sa third period aron baswaton ang koponan sa kadaugan batok STI College, 98-94 sa pagsugod sa PCCL Champions League Southern Islands finals kagabii didto sa Cebu Coliseum.
Ang Wildcats nabiyaan og kuwatro sa halftime, 50-54, apan kalit kining nanginit sa sunod nga kuwarter. Human magtabla, 58-all, ang HTC milusad og 15-4 rally aron moposte'g 11 puntos nga bentaha, 73-62 sa nahabiling 2:25 sa maong kuwarter.
Mibawos ang STI ug nakatabla sa duwa sa ikaduhang higayon, 90-all sa katapusang 1:32 sa final period, apan napakgang ang ilang mga paningkamot kay si Christopher Magsaclang miposa sa iyang duha ka mga mahinungdanong baskets aron hatagan ang HTC og 94-90 nga abante. Mihulga ang STI sa katapusang higayon sa iskor nga 94-95 sa lay-up ni Richard Kwong.
Ang HTC mipasud og tulo sa upat ka free throws sa nahabiling 16 segundos nga maoy miselyado sa duwa.
Sagubangon sa bisitang HCL ang mas daku nilang misyon kay sunod nilang sangkaon mao ang reigning CESAFI champions University of the Visayas (UV) Green Lancers karong alas-5:30 sa hapon sa dili pa magsangka ang Southwestern University (SWU) Cobras ug University of San Carlos (USC) Warriors sa alas-7:15 sa gabii.
Ang mga modaog sa duwa karon, magbagat ugma sa alas-5:30 sa hapon alang sa katungod aron makig-uban sa UAAP champion La Salle Green Archers, NCAA title-holder San Beda Red Lions ug ang top performer sa Metro Manila/Luzon qualifying sa PCCL Champions League National Finals nga gikatakda sa hinapos nga bahin ning bulana didto sa kaulohan.
- Latest
