Poligrates, Slaughter miarte dayon

CEBU, Philippines - Miarte dayon atubangan sa iyang mga fans ang Sugbuanong  si Eliud Poligrates sa labing una niyang duwa isip PBA rookie  sa usa ka tulo ka makasaysayanong simultaneous opening day sa 39th PBA season nga ginganla'g  PLDT myDSL Philippine Cup kagahapon diha sa Cebu Coliseum.

 Ang kanhi Southwestern University (SWU) Cobras nga si Poligrates mitusak og 13 puntos atol sa 89-80 nga  kadaugan sa Talk N' Text Tropang Texters batok sa ilang sister team nga Meralco Bolts.

 Si Poligrates miiskor sa una niyang puntos sa oras nga 4:11 sa first period gikan sa assist ni Jayson Castro.  Biya og dos puntos paingon sa final period, ang 27th overall pick sa miaging 2013 Rookie Draft nga si Poligrates, mibubo og nuybe sa  final kuwarter nga mihatag og 74-66 nga labaw sa katapusang 9:25 sa duwa.

 Sa pag-abiba sa mga fans matag higayon nga anaa sa iyang kamot ang bola, ang garbo sa Camotes island mipakita sa iyang katakus sa shooting diin miposa siya'g tres  atubangan  ni Gary David nga mihatod sa Texters ngadto sa 81-70 nga bentaha sa nahabiling singko minutos.

 Ang Smart Gilas cager nga si Jayson Castro maoy leading scorer sa iyang 20 puntos, si Noy Baclao mitira og 14 puntos, samtang si Kelly Williams miamot og 10 puntos alang sa Talk ‘N Text nga laraw nga mosakmit sa ilang ikaupat nga All-Filipino Cup title.

 Sikit ang duwa tali sa duha ka koponan sa first half nga miresulta sa 42-all, apan nanginit si David, kinsa miiskor og sayes puntos nga mihatag og singko puntos nga labaw sa Bolts, 57-52, sa nahabiling 5:30 sa third period.

 Apan midaro sa ilawom  si Williams diin mipasulod siya'g duha ka lay-ups sa pagsugod sa final period, gisundan sa pag-arte ni Poligrates nga maoy mihatag sa momentum sa Texters.

 Si Noy Baclao mipasulod sa iyang duha ka free throws, sundan sa tapal ni Castro ngadto ni David nga maoy mikandado sa daog sa Texters.

 Si David maoy nangulo sa Bolts sa iyang 26 puntos, gisundan ni Jared Dillinger nga adunay 11 puntos.

 Didto sa Smart Araneta Coliseum, si Greg Slaughter mihimo usab og impresibong debut dihang mirehistro siya og double-double pinaagi sa iyang 10 puntos ug 13 ka rebounds alang sa Barangay Ginebra San Miguel nga milupig sa San Mig Coffee Mixers sa iskor nga  86-69.

 Gipilde sab sa Rain or Shine Elasto Painters ang Alaska Aces, 87-74, sa laing opener didto sa University of Southeastern Philippines gym sa Davao City.

puntos matag usa

 Talk 'N Text (89) - Castro 20, Baclao 14, Poligrates 13, Williams 10, Alapag 8, Carey 8, Peek 6, Fonacier 6, Aban 4, Anthony 2

 Meralco (80) - David 26, Dillinger 11, Hodge 9, Cortez 8, Al Hussaini 7, Salvacion 6, Wilson 2, Artadi 2, Allado 2 (BANAT NEWS)