Kumo ni Martinez mura'g 'linog' kakusog
CEBU, Philippines - Gisusama ni Mexican boxer Edgar 'Chololo' Martinez (16-7, 10KOs) ang kusog sa iyang kumo sa usa ka linog nga motay-og unya ni ALA Gym stalwart fighter 'King' Arthur Villanueva (23-0, 13KOs) atol sa ilang sangka sa "Pinoy Pride XXII: The Revenge" karong Sabado sa gabii diha sa Waterfront Cebu City Hotel and Casino.
Sila si Martinez ug Villanueva magsangka alang sa bakanteng WBO International super flyweight title sa supporting bout sa WBO International super bantamweight title match tali nila ni Genesis 'Azukal' Servania ug Panamian veteran Rafael 'El Torito' Concepcion.
Mibahad si Martinez nga iyang pahamtangan si Villanueva sa labing una niyang pilde pinaagi sa "knockout."
"I am coming to him like a strong earthquake and he will feel my power," matud pa ni Martinez atol sa press conference kagahapon didto sa Formo Restaurant sa Banilad Town Centre.
Si Martinez nga maoy last-minute replacement alang ni Jose Cabrera nga maoy orihinal nga kontra ni Villanueva, nagkanayon nga ang iyang kumo maoy katapusang butang nga makita ni Villanueva sa dili pa kini mohigda ibabaw sa ring.
"I know he (Villanueva) is a strong boxer because I saw tapes of his fight but I came here to the Philippines with only one option and that is to win and bring the title to Mexico," dugang pa niya.
Bisan pa'g aduna siya'y pito ka pilde, si Martinez giisip gihapon nga usa ka delikadong kontra alang ni Villanueva tungod kay nakigsangka na kini og mga dekalibreng boksidor sama nila ni former interim WBA flyweight champion Sammy Gutierrez ug Ivan Morales, ang manghod ni Mexican ring legend Erik 'El Terible' Morales.
Si Martinez midaog sa katapusang lima niya ka away pinaagi sa knockout, ang labing uwahi mao ang iyang third round KO batok ni Victor Rodriguez niadtong Oktubre 5 didto sa Nuevo Casas Grandes sa Chihuahua, Mexico. (BANAT NEWS)
- Latest
