LUMCHICAI midaog na sab sa "3rd Barangay Captain's Cup"

CEBU, Philippines -  Milusad og mainitong rally ang LUMCHICAI sa fourth quarter nga maoy  hait nilang hinagiban  paglaglag sa Papaya Manga, 77-67 sa seniors division sa Ibabao-Estancia "3rd Barangay Captain's Cup" basketball tournament niadtong Huwebes sa gabii didto sa barangay Ibabao-Estancia Multi-purpose gym sa Mandaue City.

 Kumbati pa ang duwa sa unang tulo ka kuwarter diin  nagligas lang kini og dos puntos paghuman sa third period, 57-55 pabor sa Papaya Manga.

 Sa sayong bahin sa final period, ang LUMCHICAI mihimo dayon og 8-0 run aron moposte og sayes puntos nga labaw, 63-57 sa tandem nilang Paul Dabon ug kanhi SWU  Cobra Dotchki Abella. Misuporta sab si Jack Lumapas kansang duha ka sunod-sunod nga baskets nakatabang pagbingat sa ilang labaw, 71-60 sa nahabiling 2:55 sa duwa.

 Namintinar sa LUMCHICAI ang ilang double digits nga bentaha hangtod na sa katapusang gutlo sa duwa.

 Si Butchoy Amodia, kinsa mipupo og 13 puntos sa first quarter maoy nangu sa LUMCHICAI sa kinatibuk-an niyang 24 puntos, gisundan ni Dabon nga adunay 15 puntos, samtang ang playing coach nga si Abella ug Lumapas miabuno'g 14 ug 12 puntos matag usa.

 Si Emman Singuran mao lang ang bugtong player sa Papaya Manga ni coach Dennis Montecalvo nga nakaiskor og double figures pinaagi sa iyang 24 puntos.

PUNTOS MATAG USA

 LUMCHICAI (77) - Amodia 24, Dabon 15, Abella 14, Lumapas 12, Gonzaga 8, Villamor 4

 PAPAYA MANGA (67) - Singuran 24, Valiente 9, Canoy 8, Custodio 7, Ibasitas 6, Echavez 6, Caruana 5, Ceniza 2