Pagsabungan mi-host G.O. Bercede basketball clinic
CEBU, Philippines - Dul-an sa 200 ka aspiring hoopsters ang misalmot sa 2nd level sa G.O. Bercede Vice Mayor Sports Development basketball clinic kagahapon didto sa barangay Pagsabungan gym sa dakbayan sa Mandaue.
Ang mga partisipante nga nagpangedaron og 15-anyos ug paubos naggikan sa barangay Dungguan sa Basak Mandaue, barangay Labogon ug sa barangay Pagsabungan.
Usa sa miapil mao ang 5-anyos nga si Raphael James Capahi sa Dungguan, Brgy. Basak.
Ang duha ka adlaw nga clinic gidumala ni kanhi USJ-R Jaguar ug Cebu Landmasters cager Jerwin Espina, uban sa laing mga kanhi varsity players gikan sa nagkalain-laing kolehiyo nga silang Recham Dennison, Salvador Pagasian ug Jonbox Baclohan sa UV, Jarey Ceniza ug Marlon Demape sa USP, Jojo Bodo sa CIT, Bobby Hatague sa USJ-R ug Dotchki Abella sa SWU.
Gitudlo sa duha ka adlaw nga clinic mao ang mga fundamental sa maong matang sa paugnat sa kusog sama sa dribbling, passing, proper shooting, footwork ug uban pang mga drills.
Gawas sa mga basic sa basketbol, gitudloan usab ang mga bata og ubang estratehiya sa opensa ug depensa, on-court communication ug uban pang teknikal nga aspeto sa duwa.
Human sa clinic, adunay duwa nga himuon diin ang organizers mohashas og 15 ka players matag usa gikan sa 27 ka barangay sa Mandaue aron maoy moduwa sa tinuig nga Vice Mayor Passerelle basketball tournament.
Ang bulawanong sports development project gimugna ni Mandaue Vice Mayor Glen O. Bercede. (BANAT NEWS)
- Latest
